“Зәкең екеуіміз 1965 жылы студент кезде үйлендік. Ол кісі құрылыс мамандығының 3-курсында мен Қазақ ұлттық қыздар педагогикалық институтының физика-математика бағыты бойынша оқыдым. Бірге 27 жыл тұрдық, қолымда енем болды. Үлкен ұлым Қайрат соңғы курс оқып жүргенімде дүниеге келді. Артынан Құралай қызымыз дүние есігін ашты. Балаларды жақсы тәрбиеледік. Үйленгенімізге 30 жыл толғанда Зәкең үйден кетіп, 1995 жылы заңды түрде ажырастық. Кетерінде: “Барсаң бара ғой, бізден кетті, тек балаларың мен халқың үшін аман жүр” деп айтып жібердім. Құрылыста шебер болып жүріп әкім болды”, – дейді Нұрбике Нұрқаділова.

Оның айтуынша, Заманбек Нұрқаділов өзін-өзі атып өлтіретін адам емес еді. Күйеуін адам қолынан қаза тапты деп ойлайды.

“Ажалы адамнан болды деп айта аламын. Ол өзін-өзі үш рет ататын адам емес. Зәкең қоян да, торғай да атып көрген жоқ. “Таудың адамымын, мықтымын” деп өз-өзін көтеріп жүретін. Қызметі жаман болған жоқ, халқына танымал болды. Біз үйленген соң жалдамалы пәтерде тұрдық. Бұл кісі көп қазақтарды Алматыға тіркеді. Одан Шаңыраққа жер берді. Шаңырақта тұратын халық ол кісіге риза. Зәкең халқына көп жақсылық жасаған адам”, – дейді саясаткердің бірінші әйелі.

Бағдарлама жүргізушісінің: “Заманбек аға неден қорқатын еді?” деген сауалға ол: “Ештеңеден қорықпайтын, батыл болатын. Тік айтып, тік сөйлейтін. Колбиннің заманында облысқа келген бір бастық болды. Ол Заманбекті партияға салды, қызметінен кетіретіндей жағдайда болды. 1986 жылы студенттердің алаңға шыққан кезі. Сонда алаңда болған оқиғаны Заманбекке теледидарға шығып айту тапсырылыпты. “Қазақтың жастарын жаманда. Олар жаман нәрсеге әуес, арақ ішеді, нашар адамдар” деп айт деген көрінеді. Сөйтіп Зәкең маған келіп секретарьдің тапсырмасын айтып тұр. Мен үзілді-кесілді қарсы болдым. “Ұлың мен қызың өсіп келе жатыр. Қазақтың балалары ондай емес. Олардың тек үкімет басына қазақ басшы келгенін қалайды. Жастар бұл жағдайдың ушығып кететінін білген жоқ. Сен қожалықтың, шаруаның адамысың. Бар да, көтеріліс кезінде алаңда сынған дүниелерді қалпына келтір. “Қызметтен босатады” деп еді, қызметіңді алса алып алсын. Ертең ұл-қызың өссе ұят болмай ма?” деген едім, сол сөзіме тоқтапты. Бірақ теледидарға шығуына қарсы болдым”, – дейді Нұрбике Нұрқаділова.

Талқылау