Әйел ағзасын донорлыққа алуға бірер минут қалғанда комадан шығып, есін жинаған

Фото: Daily Mail

АҚШ-та әйел ағзаларын алу операциясына бірнеше минут қалғанда тіріліп, трансплантологтардың құрбаны бола жаздады. Бұл туралы Stan.kz ақпарат агенттігі Daily Mail басылымына сілтеме жасап хабарлайды.

38 жастағы Данелла Гальегос – үй-күйсіз жүрген әйел. 2022 жылы Нью-Мексико штатының Альбукерке қаласындағы ауруханаға түскен. Оның нақты диагнозы жария етілмеген, бірақ ес-түссіз жатқан. Дәрігерлер оны қайтымсыз комаға түсті деп анықтап, науқас енді есін жимайды деп туыстарына хабарлаған. Үміттен айырылған отбасы New Mexico Donor Services ұйымы арқылы ағзаларын донорлыққа беруге келісім берген.

Операцияға бірнеше күн қалғанда туыстары оның көзінен жас көріп, қолынан ұстаған сіңлісі саусақтарының қозғалғанын сезген. Алайда дәрігерлер мұны тек физиологиялық рефлекс деп түсіндірген. Шешуші сәт операция үстелінде туды: науқаста есінің белгісі байқалып, Гальегос дәрігерлердің нұсқауы бойынша көзін ашып-жұма бастаған, ал қолын сіңлісінің тигізгеніне қарай қозғаған. Бірақ медицина қызметкерлерінің айтуынша, донорлық қызмет өкілдері операцияны жалғастыруды талап етіп, рефлекстерді басу үшін морфин енгізуді ұсынған. Дегенмен хирургтар ағзаларды алудан бас тартты. Көп ұзамай Гальегос комадан шығып, бірнеше аптадан кейін толықтай сауығып кеткен.

"Бұл қорқынышты болды — олар бізді тезірек аяқтауға итермеледі", — деді жансақтау бөлімінің медбикесі Нева Уильямс.

Оның айтуынша, соңғы жылдары донорлық үйлестірушілер тарапынан қысым көрсету қалыпты жағдайға айналған.

"Мен тек бір қорқынышты сезіммен есімде сақтадым: бір нәрсе дұрыс емес екенін түсіндім, бірақ қозғала алмадым", — деп бөлісті Гальегос.

Қазір ол толық сауығып кеткен. Ал аурухана ішкі тергеу бастады. Гальегостың отбасы сотқа шағым дайындап жатыр. New Mexico Donor Services қандай да бір заңбұзушылықты жоққа шығарып, "соңғы шешім әрқашан емдеуші дәрігерлерге тиесілі" деп мәлімдеді.