Бұл оқиға былтырғы шілдеде басталған. Білім басқармасы комиссиясы өңір бойынша он бір жыл бойы тек “бестікке” оқып, тиісті үлгідегі аттестат алған бір топ оқушыға күтпеген жерден “Алтын белгі” беруден бас тартқан.
Мәселен С. Зиманов атындағы №37 мектептің жеті оқушысы төсбелгіге үміткер болған, алайда ішкі тексерістен кейін тізімде тек үшеуі қалыпты. Кейінірек білім басқармасы комиссиясының бұл шешіміне мұғалімдер енгізген бағалардағы түзетулер себеп болғаны анықталған. Бұдан қоса, бағалар бірнеше рет өзгертіліп, БЖБ (СОР) және ТЖБ (СОЧ) бойынша балл саны да ауысқан. Ал түлектердің өздері бұдан бейхабар.
Осылайша қабылданбай қалған түлектердің ішінен екі қыздың заңды өкілдері бұл шешімді сот арқылы даулауға шешім қабылдады.
Сот түлектердің 5-11 сыныптар аралығында барлық пәннен тоқсандық, жылдық және қорытынды бағалары “өте жақсы” болған және қорытынды аттестациядан сәтті өткені анықтады. Бұл “Алтын белгі” алуға қойылатын талаптарға сай.
Сондай-ақ сот баға қою және оны түзету педагогтердің құзыретіне жататыны айтылып, демек оқушыларға теріс салдар жүктеу дұрыс емес деп танылды.
“Білім басқармасы әкімшілік сот ісін жүргізудің негізгі қағидаттарын, оның ішінде сенім құқығын қорғау, әділдік және мөлшерлестік қағидаттарын бұзды, өйткені салдарды түлектерге олардың кінәсіз күйінде жүктеді”, – делінген хабарламада.
Сот қосымша түрде БҒМ бұйрығындағы нормаларды ескерді, яғни модерация оқу жетістігін бағалауға қатысты даулы мәселе болғанда ғана қолданылады. Бұл жағдайда, мұндай даулы мәселе болмаған. Демек, білім басқармасының модерация өткізуді талап етуі негізсіз әрі рәсім шеңберінен шығу деп танылды.
Сот комиссия отырысының хаттамасын түлектерге қатысты бөлігінде күшін жойып, білім басқармасына “Алтын белгі” беру мәселесін қайта қарауды міндеттеді. Атырау облыстық соты бұл шешімді өзгеріссіз қалдырды. Сот актісі заңды күшіне енген және орындалу сатысында.
Айта кетейік, бұған дейін қазақстандық 27 жастағы қыздың облыстық мекемеге басшы болғанын сынағаны хабарланған еді.
