Ескерткіш төңірегіндегі аянышты жағдайды бейне мен фотосуретке елорда тұрғыны Гүлмира Жақыпова түсірген. Видеоға қарап ескерткіштің күтімді қажет ететінін байқауға болады. Айнала төселген тастарды шөп басып, маңайда егілген шыршалар қурап қалған. Ал жарықтандыру мүлде жұмыс істемейді.

"Бұл құрылысшылардың ескерткішін үш жыл бұрын салып, айналасына шырша отырғызып, барлығын суретке түсіріп тапсырған еді. Ал қазір ескерткіштің ешкімге пайдасы жоқ. Оған жетудің өзі біраз ізденісті қажет етеді. Себебі оған апаратын қалыпты жол жоқ", - дейді елорда тұрғыны.

Ол ескерткіште Қазақстанның ұлы құрылысшыларының есімдері қашалғанын, оларға мұндай немқұрайлылық танытқан ұят екенін атап өтті. Ескерткіш қараусыз қалғанымен ол ешқандай бұзылмаған. Ескерткіштің қабырғалары берік және ақ түсті, барлық бөлшектері бүтін. Ескерткіш 2020 жылы елордалық "Бәйтерек" құрылысшылар одағының президенті Жамбыл Мелдебайдың бастамасымен ашылған.

Жамбыл Мелдебайдың айтуынша, ол ескерткішті өз қаражатына және қамқор азаматтардың көмегімен тұрғызған. 2020 жылы пандемия кезіндегі қиындықтарға қарамастан ескерткіш салынып, пайдалануға берілген. Осыдан кейін оның мазмұнымен әкімдік айналысуы керек еді. Әйтсе де, үш жылдың ішінде оған тұрғындар күтім жасап келеді.

"Мен өзім 70 жастамын. Жарық, камера орнаттым - ұрланды, кабель үзілді, прожекторлар ұрланды. Оны қалпына келтіруге ақша жоқ", - деді Жамбыл Мелдебай.

Елорда құрылысшылары одағы президентінің идеясы бойынша ескерткіш жанында құрылысшылар мұражайы пайда болуы керек еді. Алайда құрылысты бастау үшін 0,2 гектар жер жеткіліксіз болған. Жамбыл Мелдебай биліктен жетіспейтін аумақты беруді сұраған. Әкімдік оның орнына бұл ауданнан аукцион арқылы жаңа жер телімін сатып алуды ұсынған.

"Үш рет аукцион өтті. Жер 0,6 гектарға 500 мың долларға қойылды. Майамиде мұндай баға жоқ! Төртінші рет, бір ай бұрын 250 мың долларға сатып алынды. Нақты жоспар бойынша мұражай болуы керек еді, бірақ ол жерді кім сатып алды, оны қалай салатынын білмеймін", – деді Мелдебай.

70 жастағы ақсақал мұражай салу жоспарынан бас тартпай, оны жүзеге асыруға инвестор тауып қойыпты. Мемлекеттік органдармен ұзақ әрі нәтижесіз хат алмасудан шаршаған ол Астана әкімі Жеңіс Қасымбекпен жеке қабылдауға жазылуға үмітті.

Нұра ауданының әкімдігі ескерткіш иесіз болуы мүмкін екенін айтты.

"Мәдениет басқармасының жанынан ескерткіштер мен тарихи-мәдени мұра нысандарының сақталуын қамтамасыз ететін дирекция жұмыс істейді. Оны теңгерімге қабылдап, күтіп-баптауға кірісеміз", - деді аудан басшылығы.

Ескерткіш қаланың карталарында белгіленген. Бірақ Астананың бас жоспарында ескерткіш жоқ. Мұражайдың жоспары да табылмады. Бірақ бұл аумақта табиғи саябақ ашылады деген ақпарат бар.

Талқылау