Астананың Қылмыстық істер жөніндегі ауданаралық сотының мәліметінше, айыпталушы М. 2020 жылдан 2022 жылға дейін "Instagram" және "TikTok" әлеуметтік желілері арқылы "S-Group" қаржы пирамидасының қызметін белсенді түрде жарнамалаған. Сондай-ақ ол арқылы презентациялар, Zoom конференцияларын өткізіп, ҚР азаматтарын "S -Group" қаржы пирамидасының салымшысы болуға үгіт-насихат жұмыстарын жүргізіп, тартқан.

“Осыдан кейін сотталушы оларды кеңсесіне шақырып, ешқандай күш салмай-ақ қомақты табыс табатынына уәде етіп, оларды тіркеп, олардан қолма-қол ақша алған. 2020 жылдан 2022 жылға дейін тартылған қаражаттың (келтірілген залал) жалпы сомасы 83,1 миллион теңге”, – делінген хабарламада.

Сотталушының кінәсі жәбірленушілердің, куәлердің айғақтарымен, үгіт-насихат жұмыстарының бейнежазбаларымен, ақшалай қаражаттың түсуі бойынша кіріс ордерлерімен және қылмыстық істің басқа да материалдарымен дәлелденді. Прокурор сотталушыны 8 жыл мерзімге бас бостандығынан айыру жазасын тағайындауды сұрады.

Айыпталушы өзінің іс-әрекетінде қылмыс құрамының жоқтығын алға тартып, тағылған айыпты мойындамады. Ал жәбірленушілер өз кезегінде айыпталушыны қатаң жазалауды және азаматтық талапты қанағаттандыруды сұрады.

“Астана қаласының Қылмыстық істер жөніндегі ауданаралық соты М.-ді қылмыстық кодекстің 217-бабы 3-бөлігі 2) тармағы бойынша кінәлі деп танып, 7 жылға соттады. Сондай-ақ оған азаматтардың қаражаты мен инвестициясын тартуға байланысты коммерциялық және коммерциялық емес ұйымдарда басшылық лауазымдарды атқаруға 7 жылға тыйым салынды”, – делінген хабарламада.

Сот жәбірленушілердің 52,6 млн теңге азаматтық талабын қанағаттандырды. Қалғаны қалғаны татуласуға байланысты талап қоюдан бас тартты.

Талқылау