Кішкентай Арина биыл бірінші сыныпқа барды. Бірақ мектепке оны өзге балалар сияқты анасы емес, нағашы апасы жетектеп апарған. Беске жетер-жетпесте жетім қалған бүлдіршіннің анасы туралы естелігі жыл өткен сайын бұлыңғырланып барады.

Бұл Светлана Сәдуованың кенжесінің естелігі. Ал тоғыз жасар Арман анасын әлі де жылап еске алады. Бүлдіршіндердің анасын 2015 жылы әкелері өлтірген. Жан түршігерлік қылмыстан кейін бас сауғалаған қылмыскер бірнеше айдан соң ағасының үйіндегі жертөледен табылған-ды. Сот үкімімен 18 жылға сотталған азаматтың түрмеге қамалғанына екі жылдан асты. Төрт баланың тәрбиесін марқұмның апасы өз мойнына алған. Алайда балалар әлі күнге дейін әкелерінен сот тағайындаған материалдық шығынды өндіре алмай жүр.

«Жеке сот орындаушылары жұмыс істегісі келмейді. Ештеңе өндіре алмаймыз деп қарап отыр. Онда сот неге болды, сот неге ондай үкім шығарды?» – дейді марқұм С.Сәдуованың апасы Айгүл Дәрменова.

Судьяның үкімі мен оның орындалуы екі бөлек дүние көрінеді. Сот залынан абақтыға аттанған Қанат Сәдуовтан екі жылда бірде-бір хабар жоқ. Тас бауыр әкеден бүгін оның балалары да бас тартып отыр.

«Байланыс болмайды да. Хабарласпаймын. 18 жыл бойы отырсын түрмеде, шықпай.Балалар Петропавлда, өзім Астанадамын қазір», – дейді Сәдуовтың ұлы Талғат Сәдуов.

Үйдің үлкені Талғаттың тапқаны қалған үш баланың қажетіне жетпейді. Балалардың оқуына бола шалғайдан Қызылжарға көшкен Айгүл, мына үйді 80 мыңға жалдап тұрады. Жетімдер мемлекеттен де ешбір көмек көрмейді. Есесіне, мемлекеттің есебінен ішіп-жеп, қамауда жатқан әкелері жұмыс істеуден бас тартыпты. Ал мәжбүрлеп жегуге заңның күші жоқ.

«Асырап алушы сот бұйрығын алуға өтініш беруі керек. Ол күшіне енген соң, бұйрықты сот орындаушысы арқылы түзету мекемесіне тікелей жібереді. Мекеменің арнайы бөлімшесі қарызды сотталушының табысынан ұстап отыруы керек. Әрине, егер де табыс болса», – дейді заңгер Олег Корчагин.

Бір сөзбен, заңның қылмыскердің құқығын қорғауға күші жеткенімен, жылап қалған жетімдерді жебеуге әмірі жүрмейді. Жұмыс істемек түгілі, жөн айтуға ерінетін сот орындаушыларына шара таппаған жетімдер, жанайқайы журналистер арқылы құзырлы органдарға жетеді ме деген үмітте.

Жіберіп алмаңыз:

Павлодарлықтар трамвай қағып өлтірген қыздың отбасына жабылып баспана алып бермек

12 жасында студент атанған Абзал Мырзаш ҚБТУ-да қалай оқып жатыр

Қазақстандық жігіт Майамиде қалған отандастарына іздеу салып, көмектесуге әзір екенін айтып жатыр

Көкшетаулық жігіт жетім қызды сексуалды құлдыққа сатып жіберген

Талқылау