Ардақ Амангелдиев денсаулық сақтау вице-министрі болып тағайындалды
Үкіметтің қаулысымен Ардақ Амангелдіұлы Амангелдиев денсаулық сақтау вице-министрі болып тағайындалды. Бұл туралы Stan.kz ақпарат агенттігі хабарлайды.
Фото: Gov.kz
Ардақ Амангелдиев 1975 жылы дүниеге келген. Ол Бөкетов атындағы Қарағанды мемлекеттік университетін тәмамдаған. Сонымен қатар Ли Куан Ю атындағы мектеп пен Д.Кеннеди атындағы Гарвард мектебінің бірлескен шеберлік бағдарламасы бойынша оқыған.
Еңбек жолын 1996 жылы Қарағанды облыстық қаржы басқармасының бас маманы болып бастады. Әртүрлі жылдары қаржы министрлігінде, экономика және бюджеттік жоспарлау министрлігінде, денсаулық сақтау министрлігінде, "Қазына" тұрақты даму қорында, "Самұрық-Қазына" ұлттық әл-ауқат қорында, Ұлттық банкте, премьер-министрдің кеңсесінде және президент әкімшілігінде қызмет етті.
2016-2023 жылдары "Астана" халықаралық қаржы орталығында басқарушы кеңесші және АХҚО басқарушы директоры болып жұмыс істеді.
Жаңа қызметінде ол стратегия, экономика және қаржы мәселелеріне жетекшілік етеді.