Америкалық отбасы асырап алған қазақ қыз 26 жылдан кейін туған анасымен кездесті 

Қазақстандық әйел америкалық отбасы асырап алған қызымен 26 жылдан кейін кездесті. Сейдж есімді қыз анасымен жолығу үшін Астанаға келген. Бұл туралы Stan.kz ақпарат агенттігі хабарлайды Jibek Joly арнасына сілтеме жасап хабарлайды. 

Сюжеттен скриншот

Сейдждің бұрынғы есімі Гүлмира екен. Ол 1997 жылы балалар үйіне түсіпті. Ал америкалық отбасы асырап алған соң Гүлмираға барлық шындықты айтыпты. Туған анасын табу үшін бойжеткен АҚШ-тағы Қазақстан елшілігінің көмегіне жүгініпті. 

Гүлмирамен кездесу үшін әуежайға Смағұловтар отбасы толығымен келді. 

"Бұл – тағдыр дайындаған ең керемет сыйлық. Барлық үш баламның қайта жүздескеніне ризамын. Қызыма осы үшін алғыс айтқым келеді", – деді Роза Смағұлова. 

Ал Сейдж осындай үлкен отбасының болғанына қуанатынын жеткізді. 

"Тек туған анамды емес, туған бауырларымның да табылғанын естіген сәтті мәңгі есте сақтаймын. Жылап жібердім, таңғажайып жағдай. Менің әуежайдан күтіп алу үшін әр қаладан келген туыстарым мен отбасыма рахмет", – деді Сейдж. 

Әуежайдағы жүздесуден кейін Смағұловтар отбасы үйлеріне аттанған. 

"Менің сіңілімнің барын білгенде сене алмадым. Кездесуге дейін оның Facebook-парақшасын бақылап, үнемі жылайтынмын. Себебі жанында бола алмадым. Бірақ асырап алған отбасыда әпкесі мен ағасы бар екенін байқадым", – деді Сейджің әпкесі Тұрсын Кемелбек. 

Сейдж Қазақстанда 1 қазанға дейін болады. Анасы және әпкесімен бірге Алматы, Ақтау мен Маңғыстау қалаларына бармақ.