Алматының ескі автобустары 160 миллион теңгеге сатылып, қоқыс үйіндісіне жөнелтілмек

Фото: e-auction.e-qazyna.kz

Ескі алматылық автобустар 160 миллион теңгеге сатылды, енді ол темір-терсек үйіндісіне  жөнелтіледі. Бұл туралы Stan.kz ақпарат агенттігі хабарлайды. 

Электронды сауда алаңы порталының мәліметінше, Алматының ескі автобустары аукционда 160 миллион теңгеге сатылды. "Алматыэлектротранс" коммуналдық автобус паркі 573 көлік қойды, лоттың бастапқы бағасы 93 миллион 314 мың 747 теңге болды. Аукцион 3 маусымда басталды және енді аяқталды.

• Қазақстанда автобустарға жүргізушілерді жолаушылардан қорғауға арналған кабина орнатылмайтын болды

Талдықорғанға жөнелтілетін автобустар 160 332 109 теңгеге сатып алынды. Аукцион жеңімпазы 60 күн ішінде "автобустар зираты" деп аталатын жерден көліктерді алып тастауы керек. Ол Алматыдан солтүстікке қарай 50 шақырым жерде орналасқан. "Зиратта" сақталған ең көне автобус 2010 жылы шығарылған (Қытайдың Yutong маркасы), ал ең жаңасы 2018 жылы шығарылған (Ресейлік ЛиАЗ маркасы).

Айта кетейік, бұған дейін Алматыда қолданыстан шығарылған қоғамдық көліктер қайтадан сатылымға қойылғаны туралы жазған едік. Электронды сауда сайтында жарияланған лот сипаттамасына сәйкес, пайдалануға жарамсыз деп танылған 573 автобус сатылымға шығарылған. Көліктер Алматы облысындағы Қайназар ауылында, "Дархан" ЖШС аумағында тұрған көрінеді. Аталған техникалардың иесі – "Алматыэлектротранс" ЖШС.