Алматылықтар қала жолдарындағы шұңқырлар туралы ақпаратты чат-ботқа жібере алады
Алматы жолдарындағы ақаулар туралы Almaty_Joly Telegram-арнасының чат-ботына хабарлауға болады. Бұл туралы Stan.kz ақпарат агенттігі хабарлайды.
Фото: pixabay
"Алматыда мегаполис тұрғындары қала жолдарындағы шұңқырлар және оларды жөндеу бойынша өтініш бере алады. Ол үшін @AlmatyJolybot чат-ботына (https://t.me/AlmatyJolybot) жол инфрақұрылымына арналған арнайы Telegram-арнаға мыналарды жіберу қажет: өтініш мәтіні, фото/жол бейнесінің ақауы, мекенжайы және нақты координаттары, байланыс деректері", – делінген әкімдіктің хабарламасында.
Түскен өтініштер өңделгеннен кейін әр жағдай бойынша жол төсеміндегі кемшіліктерді жою үшін шаралар қабылданады.
"Сонымен қатар Almaty_Joly Telegram-арнасында (https://t.me/AlmatyJoly) жол-жөндеу жұмыстары, қалалық көлік жұмысындағы өзгерістер туралы ақпарат жарияланатынын хабарлаймыз", – деді Алматы әкімдігінің баспасөз қызметі.
Еске салайық, бұған дейін Алматыда 24 сәуір мен 31 мамыр аралығында М.Ганди көшесінен Тимирязев көшесіне дейін Батыс Желтоқсан көшесі бойынша автокөлік қозғалысы ішінара шектелетіні туралы жазған едік. Бұдан бөлек құбырды және асфальт жабынының төменгі қабатын төсегеннен кейін жолдың бүкіл еніне полимерді қолдана отырып, асфальтбетон төсеу жүргізіледі.