Алматыдағы барахолкада тағы да өрт шықты
Алматыдағы Байсат базарында контейнерлер өртенді. Бұл туралы Stan.kz ақпарат агенттігі хабарлайды.
Төтенше жағдайлар департаменті Байсат базарындағы өрт туралы ақпараттың 21 тамызда 14:02-де келіп түскенін мәлімдеді. Оқиға орнына жеткен өрт сөндірушілер екі қабатты контейнерлердің жанғанын анықтаған.
"Дереу жапсарлас қойылған контейнерлерді сөндіруге және салқындатуға өрт оқпандары енгізілді, өрт-автоцистерналары объектінің өрт гидранттарына орнатылып, магистральдық желілер созылды, судың үздіксіз берілуі қамтамасыз етілді. Оқиға орнында екі өрт сөндіру учаскесі құрылды, газ-түтіннен қорғау қызметінің үш буыны жоғары температура мен қатты түтін жағдайында жұмыс істеді", – деп хабарлады ведомство өкілдері.
Жалын 25 минутта оқшауланып, 14:50-де толығымен сөндірілген. Нәтижесінде көрші контейнерлер мен тауарлары бар сауда қатарлары аман қалды.