Алматыда тұрғындарды 15 миллион теңгеге алдап кеткен ер адам ұсталды
Алматылықтарды 15 миллион теңгеге алдап кеткен алаяқ қамауға алынды, деп хабарлайды Stan.kz ақпарат агенттігі.
Алатау ауданының полиция қызметкерлері 30 жастағы азамат Е.-ге қатысты ҚР ҚК-нің 190-бабы 3-бөлігі бойынша қылмыстық іс қозғады.
"Ер адам Алматының бірнеше тұрғынын алдады деген күдікке ілінді. Оның әрекетінен келтірілген жалпы материалдық шығын шамамен 15 миллион теңге. Күдікті өзін дөңгелектер мен дисктерді тек көтерме жеткізуші ретінде таныстырған. Алам деушілерге тікелей қоймадан арзан бағадағы тауарды алып беруге уәде беріп, тауар төлемін алдын алып отырған. Ол тауардың көлеміне қарай 500 мыңнан 6 миллион теңгеге дейін алған. Бүгінгі күні оның үстінен 12 азаматтан полицияға арыз түсті", – деді Алатау аудандық полиция басқармасының бастығы Ілияс Өмірсеріков.
Күдікті уақытша ұстау изоляторына қамалды. Полиция өкілі, Е. есімді азаматтың қылмыстық әрекеттерінен зардап шеккен адамдардан мына телефондар арқылы хабарласуларын сұрайды: 8-700-300-99-96; 8-778-626-11-08.