Алматыдан Талдықорғанға жеткізілуі тиіс вакцина партиясы жолда бүлінді
Алматыдан Талдықорғанға жөнелтілген "Спутник V" вакцинасының жеті мыңға жуық құтысы жол-көлік оқиғасының салдарынан жарамсыз болып қалды, деп хабарлайды Stan.kz ақпарат агенттігі.
Вакцина Алматы облысының денсаулық сақтау басқармасының қоймасына жеткізілуі тиіс еді. Алайда екпені әкеле жатқан көлік жол апатына ұшыраған.
"Жол-көлік оқиғасы болған жерден вакцина Алматыдағы мердігер ұйымның қоймасына жеткізілді. Бүлінбеген контейнерлер болды. Тексере келе, вакцинаның 6875 дозасы жарамсыз болып қалғаны анықталды", – делінген ДСМ хабарламасында.
Министрлік хабарлауынша, бұзылмаған вакцина құтылары да табылған.
Айта кетсек, "Спутник V" вакцинасының екі компонентінің құны 866,81 рубльге (шамамен 5 мың теңге) тең. Жарамсыз болып қалған 6875 вакцина дозасының бағасы 34,4 миллион теңгеге жетеді.
Денсаулық сақтау министрлігі дәрі-дәрмектер мен медициналық мақсаттағы бұйымдарды бірыңғай дистрибьютордың тізімі бойынша тегін медициналық көмектің кепілдендірілген көлеміне сәйкес бөлу аутсорсингке берілгенін, логистикалық жеткізуші – "KFK Medservice Plus" ЖШС екенін еске салды.
Сақтау және тасымалдау қызметтерін көрсету шарты бойынша мердігер жоғалған немесе бүлінген тауарларды өтейтін болады.
