Алматыда көлік көпірден құлап кетті: Зардап шеккендер ауыр жағдайда
Алматыда Toyota Camry Volkswagen Golf көлігімен соқтығысқан соң көпірден құлап кетті. Салдарынан 7 адам зардап шекті деп хабарлайды Stan.kz ақпарат агенттігі.
Зардап шеккендердің 3-і ауыр жағдайда. Жол апаты Рысқұлов мен Күдерин көшелерінің қиылысындағы көпірде болған. Соққы салдарынан Toyota Camry қоршауды бұзып, төмен құлап кеткен.
Жол-көлік оқиғасынан 2 жүргізуші сен Camry көлігінің 5 жолаушысы жарақат алды. Қоғамдық денсаулық сақтау басқармасының мәліметінше, қалалық ауруханаға жедел жәрдеммен 4 адам жеткізіліпті. Оларға бас сүйек-ми жарақаты, сүйек сыну және түрлі дәрежедегі дене жарақаттары диагнозы қойылған.
"Көмек көрсетілген соң зардап шеккендердің бірі амбулаторлық ем қабылдауға жіберілді, үшеуі ауруханаға жатқызылды. Екеуі жансақтау бөлімінде, бірі травматология бөлімінде. Қазір жағдайы ауыр деп бағаланды", – делінген хабарламада.
Тағы бір адамның жағдайы орташа ауыр деп бағаланған. Ол №7 қалалық клиникалық аурухананың нейрохирургия бөліміне жатқызылды.