"Дәрігерлерді жазалау керек. Адамды өз қолдарымен өлтіріп отыр ғой олар. Әйелімді аман-есен дәрігерлерге өзім апарғанмын. Ол жерде 6 адамның кінәсі боп тұр. Әйелім қайтыс болып кетсе де, ішіндегі баланы алмаған. Соған мен “не деген бұлар қанішер адамдар?” деп таңғалам, ", - дейді марқұмның жолдасы Бақытжан Ерментаев.

Қазір іс бойынша сотқа дейінгі тергеу аяқталған. 9 қаңтарда бірінші сот отырысы өтуі керек. Үш перзентімен жалғыз қалған Бақытжан кінәлілердің әділ жазалануын сұрайды.

"Әлі есеңгіреп жүрмін. Ұйықтасам да түсімнен кетпейді. Анасыз бала қалай болады, қиналамыз. Балаларым да, өзім де, әке-шешем де қиналып жүр. Бос үйге кіресің", - деді Бақытжан Ерментаев.

Бүгінде Алматыда мұндай оқиғалардың саны азаймай тұр. Тоғыз айдың өзінде 21 келіншек босану не жүктілік кезінде көз жұмған. Мамандар өлімнің көбеюіне вирусты себеп болып отыр деді.

"Ана өлімінің бірнеше себебі бар. Ал соңғы жылдағы ана өлімінің Қазақстанда көбеюінің бірден бір себебі ол – коронавирус. Қазір ең көп ана өлімін берген сол. Ал акушерлік жағынан келетін болсақ, қан кетулер, дер кезінде дәрігерге қаралмау себеп болады", - дейді акушер-гинеколог Әйгерім Ақшабаева.

Психолог мамандар мұндайда жаңа туылған сәбидің болашағын ойлаған жөн дейді.

"Ана өлімі әсіресе жақындарына, әсіресе, жаңа туған сәбидің психологиясына қатты әсер етеді. Анасыз өскеннен кейін кейбір балалар өзін кінәләйді. Мені туам деп өмірден кетті дейді. Ондай балалар, әрине, ынжық, өзіне сенімсіз болады", - деп мәлімдеді отбасылық психолог Айгүл Алтайқызы.

Жалпы еліміз бойынша былтыр 156 әйел көз жұмған. Яғни көрсеткіш 2,8 есеге өскен. Белсенділер өлімнің артуына көбіне білікті маман мен озық технологияның жетіспеуінде дейді. Болғанның өзінде дұрыс пайдаланбайды деп топшылады.

Талқылау