Алматы облысында ата-анасының кесірінен балалары тірідей жанып кете жаздады

Алматы облысында темекі шекпекші болған ата-аналарының кесірінен балалары өртеніп кете жаздады, деп хабарлайды Stan.kz ақпарат агенттігі. 

Бұл туралы Алматы облысы ТЖД баспасөз қызметі мәлім етті. 

Өрт 2021 жылғы 14 қаңтарда сағат 11.27-де Алматы облысы ТЖД Талдықорған қаласы, "Мушелтой" шағын ауданы, 28 үйде орын алған. 

"Өртті сөндіру бойынша жедел қабылданған шаралар барысында Алматы облысы ТЖД қызметкерлері жанып жатқан және қалың түтінделген пәтерден 4 адамды құтқарды, оның ішінде екі бала (1981 ж.т. ер адам, 1984 ж.т. әйел адам және 2015, 2019 ж.т. екі бала), олар Талдықорған қаласындағы облыстық және көпсалалы балалар ауруханаларына, жану өнімдерімен улану, ауырлығы орташа жай-күй диагнозымен жатқызылды. ТЖД күшімен 15 адам, оның ішінде 8 бала баспалдақ шеруінен эвакуацияланды, 35 адам өз бетінше эвакуацияланды", - делінген ресми хабарламада.

Өрт сөндіру және адамдарды құтқаруға Алматы облысы ТЖД-нің 27 қызметкері мен 7 техникасы, Алматы облысы ПД-нің 10 қызметкері мен 4 техникасы, қаланың авариялық және шұғыл қызметтерлері жұмылдырылды.

Құтқарушылар өрттің болжамды шығу себебі темекі шегу кезінде отты абайсыз қолдану екенін айтады.

"Алматы облысының ТЖД азаматтардан өрт қауіпсіздігінің барлық шараларын сақтауды, жас балаларды ересектердің қарауынсыз қалдырмауды және төсекте темекі шекпеуді сұрайды, әсіресе ішімдік ішкен күйде", - деп қосты департамент өкілдері.