"Алғаш рет неке қияр сәтте көрдім": Актер Дәурен Айдарқұлов өзінен 15 жас кіші қызға үйленген

Фото: threads.com/@daurenaidarkulov

Танымал актер Дәурен Айдарқұлов “TalkLike” бағдарламасына берген сұхбатында үшінші әйелі туралы әңгімелеп, бірқатар сұрақтарға жауап берді. Бұл туралы Stan.kz ақпарат агенттігі хабарлайды.

Өнер иесінің үшінші әйелінің есімі – Жұлдыз. Актердің айтуынша, танысқаннан 2 апта өткеннен кейін ағасының алдынан өтіп, үйленуді жоспарлаған.

“Мен 2022 жылдан бері өзіме жар іздеп жүрмін. Осы уақыт аралығында қаншама қызбен таныстым, біреуі ұнамайды, біреуімен сәйкес келмейміз. Мен Threads желісін өзіме әйел іздеу үшін қолданғандықтан, бір уақытта желінің өзі маған қандай қыз керек екенін түсініп, тек оранған қыздарды ұсына бастады. Сөйтіп ұнатқандарыма жазатынмын. Қазіргі келіншегіме жаза бастағаннан бірден әңгімеміз жарасты. Есімі Жұлдыз. Танысқаннан 2 апта өткеннен кейін Астанаға арнайы барып, ағасымен таныстым. Әкесі 2016 жылы қайтыс болған екен, сондықтан ағасының алдынан өтіп, келісімін алдым. Әрі қарай тойды жоспарладық”, – деді ол.

Ол қазіргі әйелі актердің бұған дейінгі өмірінен хабардар екенін ашып айтты.

“Үшінші әйелім менің бұған дейін екі рет үйленіп, ажырасқанымды біледі. Ешқандай мәселе жоқ. Бұл тақырып несие тарихы сияқты ғой. Менің несие тарихым керемет емес. Екі рет ажырасқанмын, бес балам бар. “Кім қарайды? Кім тиеді?” деп ойлайсың ғой, бірақ Алланың қалауымен бұрын тұрмыс құрмаған жар кездестірдім”, – деді ол.

Белгілі актер әйелінің өзінен 15 жас кіші екенін жасырмады.

“Біз әлеуметтік желі арқылы танысып, сөйлесе бастадық. 19 шілдеде таныстық, 26 қыркүйекте некеміз қиылды. Мен оны алғаш рет неке қияр сәтте көрдім. Яғни бір-бірімізді бірінші рет өмірде сол кезде көрдік. Енді бірге өмір сүру барысында бір-бірімізді ақырындап танып жатырмыз. Әйелім 28 жаста, 1997 жылы туған. Жас айырмашылығымыз 15 жас. Екеуміз танысқанда ол ақыл тоқтатқан қыз болды. Үйде онлайн жұмыс істейді. Түрлі жалған ақпараттар тарап жатыр ғой. Бірақ шындықты осында айтайын”, – деді ол.

Сондай-ақ Дәурен Айдарқұлов қайын жұртымен қарым-қатынасы туралы әңгімеледі.

“Солтүстіктің оңтүстікке көзқарасы ерекше ғой. Олардың тарапынан “Шымкентке тұрмысқа шығып жатырсың, Алматыда тұрсаң да, ол жігіттің өзі де, ата-анасы да шымкенттік” деген сияқты уайым болды. Қазіргі енеммен ашық отырып сөйлестік, оған уайымдайтындай дүние жоқ екенін айттым. Қазір өзінің де көзі жетіп жатыр деп ойлаймын. Енеммен қарым-қатынасымыз жақсы”, – деді ол.

Айта кетейік, биыл қазан айында Дәурен Айдарқұлов үшінші рет шаңырақ көтерді. Кейінірек ол үшінші әйеліне құда түсіп, ұзатып алғаны хабарланған еді.

Сондай-ақ Дәурен Айдарқұлов үшінші әйелімен қалай танысқанын айтып берді.