Ақтөбеде бюджеттен 70 миллион теңгені жымқырды деп айыпталып, кейін ақталғандар қайта жазаға тартылмақ
Ақтөбеде "ДосДанАй" компаниясының құрылтайшысы Мхитар Манукян мен сол компанияның директоры Миржан Есеновке қатысты ақтау үкімінің күші жойылды. Бұған дейін олардың ісін қараған құқық қорғау қызметкерлерін істі дұрыс жүргізбеді деп жазаға тартқан болатын. Бұл туралы Stan.kz ақпарат агенттігі "Диапазон" басылымына сілтеме жасап хабарлайды.
Бұған дейін Экономикалық тергеу департаменті Манукян мен Есеновке қатысты қылмыстық іс қозғаған болатын. Біріншісі - алаяқтық, екіншісі - "Қобда-Мәртұқ" жолын жөндеу кезінде жасалған қылмысқа қатысы бар деген айып тағылды. Тергеу сотталушылар бюджетке 70 миллион теңге шығын келтірген деп есептеді.
Бірінші сатыдағы сот іс бойынша көптеген заңбұзушылықтарды анықтап, екі сотталушыны да кінәсіз деп танып, ақтау құқығын қалдырды. Сондай-ақ, Экономикалық тергеу департаментінің басшылығы мен Ақтөбе облысының прокурорына сотқа дейінгі тергеп-тексеру кезінде тәртіп бұзғаны үшін жеке қаулы шығарды.
Алайда таяуда Ақтөбе облыстық сотының апелляциялық алқасы ақтау үкімін бұзып, қылмыс әлі де болғанын анықтады.
Сот Манукян мен Есеновті алты жылға бас бостандығынан айырды, олар жазасын орташа қауіпсіздіктегі қылмыстық-атқару жүйесі мекемесінде өтейтін болады. Олар сот үкімін жариялағаннан кейін қамауға алынды. Сондай-ақ сот жолаушылар көлігі және автомобиль жолдары басқармасының пайдасына сотталғандардан келтірілген шығын үшін 70 миллион теңге өндіру туралы шешім шығарды.