Ақтөбеде 25 адам мінген автобус суға кетті
Ақтөбеде 25 адам мінген вахталық автобус суға кетті, деп хабарлайды Stan.kz ақпарат агенттігі “Астана” арнасына сілтеме жасап.
Автобустағы адамдар аман қалған. Вахталық әдіспен жұмыс істейтін жұмысшылар екі көлікпен үйлеріне қайтып бара жатқан.
Жолды қысқарту үшін қыс бойы өзеннің тайыз жерінен өтіп жүрген олар бұл жолы көктемгі тасқынды ескермесе керек. Судың ортасына жеткенде көліктері жүрмей қалған. Ер адамдар су толған автобустың төбесіне шығып, көмек келгенше бас сауғалады.
“Оларға Жем өзеніндегі өткел арқылы өтуге тыйым салынғанын ескерттік. Соған қарамастан, екі вахталық көлік судың үстімен өтпекші болған. Бірақ көліктері тұрып қалған. Жұмысшылар құтқарылды, машиналары сол жерде қалды”, – дейді Ақтөбе облыстық ТЖД басшысының орынбасары Құмар Тұрмағамбетов.
Ал Алға ауданында бір үйір жылқы құтқарылды. Олар Елек өзенінің бойында жайылып жүрген. Су көтеріліп, өзен арнасы толған кезде жылқылар су ортасында, жағалаудан 400 метр жерде қалып қойған. Жылқылар әуелі моторлық қайықпен барған құтқарушылардан үркіп қаша бастапты. Бірақ жігіттер айғырға арқан салып, үйірімен бірге жағаға шығарды.