Ақтөбе облысында полиция бастығы майор атағынан айырылып, бес жарым жылға сотталды
Ақтөбе облысының полиция департаменті Мәртөк аудандық бөлімі бастығының орынбасарына үкім шықты. Ол қызметтік өкілеттігін асыра пайдаланғаны үшін сотталды.
Фото: ІІМ
Мәртөк аудандық сотында Е-ге қатысты қылмыстық іс қаралды.
"Сот Е-ні полиция майоры арнаулы атағынан, өмір бойына мемлекеттік қызмет атқару құқығынан айыра отырып, оған бес жыл алты ай мерзім бас бостандығынан айыру жазасын тағайындады", – деп хабарлады Мәртөк аудандық сотының баспасөз қызметі.
Сонымен қатар іс бойынша заң бұзушылық фактілерінің анықталуына байланысты Ақтөбе облыстық ІІД бастығының атына жеке қаулы шығарылды.
Е Мәртөк аудандық бөлімі бастығының орынбасары бола тұра, 2020 жылдың тамыз айында өзіне берілген өкілеттіктерді асыра орындап, қылмыстық іс бойынша заттай дәлелдемелерді, яғни түрлі ассортименттегі темекінің 611 960 қорабын "А" ЖШС-не заңсыз түрде берген.
"Сонымен бірге "А" ЖШС-нен темекі өнімдерін сатудан түскен қаражат департаменттің есеп айырысу шотына түспеген, нәтижесінде мемлекетке аса ірі көлемде 243 миллион теңге материалдық залал келтірілген, – деп мәлімдеді Мәртөк аудандық сотының баспасөз қызметі.
Сотталушы өз кінәсін мойындамай, темекіні одан әрі сату үшін "А" ЖШС-не бергенін, ешқандай пайдакүнемдік мақсатты көздемегенін түсіндірді.