АҚШ-та трансгендерлерге әйелдер арасындағы жарыстарға қатысуға тыйым салынды

Фото: The Washington Post

-тың Олимпиада және Паралимпиада ойындары комитеті (USOPC) трансгендер әйелдерге әйелдер арасындағы спорттық жарыстарға қатысуға ресми түрде тыйым салды. Бұл туралы Stan.kz ақпарат агенттігі хабарлайды. 

Бұл жаңа ереже 2025 жылдың 1 тамызынан бастап күшіне енеді және елдегі барлық ұлттық спорт федерациялары үшін міндетті болады.

USOPC жаңартқан саясатқа сәйкес, ерлердің жыныстық жетілу кезеңінен өткен трансгендер әйелдер енді әйелдер санатында жарыса алмайды. Бұл шешім бұған дейін АҚШ президенті қол қойған "Keeping Men Out of Women’s Sports" ("Ерлердің әйелдер спортына қатысуына жол бермеу") атты жарлық негізінде қабылданды.

Ұйым өкілдерінің айтуынша, бұл өзгерістер спорттағы әйелдер үшін әділ әрі қауіпсіз жағдай жасау мақсатында енгізілген. Алайда, адам құқықтарын қорғаушылар мен ЛГБТ қауымдастықтарының өкілдері жаңа ережеге алаңдаушылық білдіріп, оны кемсітушілік және спортшылардың құқықтарына қауіп төндіреді деп сынады.

Айта кетейік, мұндай шектеулер АҚШ-тың 25-тен астам штатында бұрыннан бар. Сонымен қатар, Жоғарғы сот та мектеп спортындағы трансгендер қыздарға қатысты шектеулер бойынша бірқатар істерді қарауға дайындалып жатыр.

Жаңа ережелер АҚШ-тың халықаралық жарыстарға, соның ішінде 2028 жылы Лос-Анджелесте өтетін Олимпиадаға қатысатын ұлттық құрамаларының жасақталуына әсер етуі мүмкін.