Ақмолада ономастика саласының мәселелері талқыланды

Көкшетауда "Ақмола, Жамбыл облыстарының топонимдері" атты республикалық ғылыми-практикалық оффлайн-онлайн семинары өтті, деп хабарлайды Stan.kz ақпарат агенттігі облыстық ішкі саясат басқармасына сілтеме жасап.

Басқарма мәліметінше, іс-шараны Қазақстан Республикасы Мәдениет министрлігі Мәдениет  комитеті мен "KAINAR" кәсіби дайындықтың жоғары мектебі Ақмола облысы әкімдігінің қолдауымен ұйымдастырды.

Басқарма маманы Әсем Жұмағұлованың айтуынша, семинарда ономастика саласына қатысты бірқатар мәселелер, атап айтқанда, облыстардағы  тарихи атаулардың  этимологиясын диахрондық әдіс тұрғысынан зерттеулер, нақты дәлелдермен тарихи атауларды қалпына келтіру туралы пікірлер айтылды.

Семинарға Мәдениет комитеті төрағасының орынбасары Күміс Сейітова  мен ономастика басқармасының басшысы Елерке Төрехан және облыстың аудандық және қалалық мәдениет және тілдерді дамыту бөлімдерінің басшылары мен мамандары қатысты.

Сәкен Сейфуллин атындағы Қазақ агротехникалық университетінің профессоры, филология ғылымдарының докторы Сәуле Иманбердиева "Тарихи-диахрондық әдісті қолдану арқылы ономастикалық  атауларды жүйелендіру қызметі" жобасы туралы баяндаса, Дулати атындағы Тараз өңірлік университетінің профессоры, филология  ғылымдарының кандидаты З.Құламанова, Лев Гумилев атындағы Еуразия ұлттық университетінің профессоры, география ғылымдарының докторы Қуат Сапаров тарихи топонимдер жайлы сөз қозғады. 

"Ақмола облысының топонимдерін тарихи-диахрониялық әдісті қолдану арқылы жүйелендіру - өңір топонимдерінің кестелі сөздігін жасау, онимдерді топтастыру және уәжі, яғни номинативтік принципін анықтау сияқты жұмыстар аясында  жүргізілді. Жұмыстың дереккөздері ретінде Ақмола облысының аймағына қатысты 1845 жылдан бүгінгі күнге дейінгі карталар Ресей және отандық мұрағаттар мен ғылыми-зерттеу материалдары, ғалымдардың еңбектері, көркем әдебиет мәтіндері алынды" - деп мәлімдеді Г.Бекенова. 

Айта кетейік, бұған дейін  Ақмола облысы ішкі саясат басқармасының тапсырмасымен ғалым Жамбыл Артықбаевтың "Ақмола облысының топонимикасын зерттеу жұмыстары бойыша кітабы  жарық көрді.