Ақмола облысында еріген қар суы қала көшелерін басып қалды
Ақмола облысы Бұланды ауданына қарасты Макинск қаласында көктемгі қар суының еруі салдарынан көшелерді су басты. Бұл туралы Stan.kz ақпарат агенттігі хабарлайды.
Фото: instagram.com/makinsk_blog
Тасқын салдарын жою үшін жүзден астам құтқарушы жұмылдырылды.
"Апаттық-құтқару жұмыстарын жүргізу үшін Ақмола облысы және Астана қаласы төтенше жағдайлар департаментінен төрт топ тартылды. Құрамында 130 адам, 13 техника, 12 мотопомпа және жылжымалы сорғы станциясы бар. Құтқарушылар су басқан аумақтардан суды сору жұмыстарын бастады. Жұмыстар тәулік бойы жүргізіліп жатыр", – деп хабарлады облыстық төтенше жағдайлар департаменті.
Макинск тұрғындары әлеуметтік желіде қаладағы тасқын туралы видеолар бөлісті. Видео авторының айтуынша, су басқан аудандардан тұрғындарды эвакуациялау жоспарланған. Басқа бір видеода барлық жағынан судың ортасында қалған үй көрсетілген.
Бұған дейін синоптиктер Боқсұқ өзенінің Журавлевка ауылындағы гидрологиялық бекетінде 4 сағат ішінде су деңгейі 36 сантиметрге көтерілгенін хабарлаған еді.
"Сағат 12:00-дегі жағдай бойынша су деңгейі – 625 сантиметр (қауіпті деңгей – 690 см), су айдынының жағдайы – бекеттен жоғары мұз кептелісі, сирек мұз жүрісі байқалады. Өзендегі су деңгейінің көтерілуі – қар жамылғысының жылдам еруі және жоғары ағыс бағытынан еріген қар суының келуімен байланысты", – деп хабарлады Қазгидромет.
Мамандар алдағы уақытта су деңгейінің одан әрі көтерілуі мүмкін деп болжады.
Еске салайық, бұған дейін мамандар Солтүстік Қазақстанда су тасқынының екінші толқыны басталғанын және оның алғашқыға қарағанда әлдеқайда күшті болатынын айтты. Әзірге су деңгейінің көтерілуі ғана тіркеліп жатыр. Заречный шағын ауданы мен Есіл өзенінің жайылмасында орналасқан 8 мыңға жуық саяжай, сондай-ақ республикалық тас жол қазір қауіпті аймақта. Мамандар екінші толқынның бірінші толқынмен түйісуі мүмкін екенін жоққа шығармайды. Ол әзірге қауіпті деңгейге жеткен жоқ, бірақ қиындықтар туғызды.