5%-бен 50 миллиард теңге: Қазақстанда мал бордақылау алаңдарына жеңілдетілген несиелер беріліп жатыр

Фото: istockphoto.com

"Бәйтерек" холдингінің еншілес ұйымы "Аграрлық несие корпорациясы" АҚ Қазақстан Үкіметінің қолдауымен мал бордақылау алаңдарын жеңілдетілген несиелеу бағдарламасын іске асыруды жалғастырып отыр.

Баспасөз қызметінің мәліметінше, қазір бағдарлама аясында жалпы сомасы 23,3 миллиард теңгеге 45 өтінім түскен. Оның ішінде 22,3 миллиард теңгенің 42 өтінімі ірі қара мал бордақылауға, ал 950 миллион теңгенің 3 өтінімі ұсақ мал бордақылауға қатысты.

Белсенділік танытып отырған өңірлер қатарында Батыс Қазақстан, Түркістан, Ақтөбе облыстары және басқа да бірқатар аймақтар бар.

Бағдарлама ауыл шаруашылығы тауарын өндірушілерді айналым қаражатын толықтыру үшін несиелеуді көздейді. Негізгі басымдық ірі қара және ұсақ мал, жем-шөп, жанар-жағармай, мамандандырылған техниканың қосалқы бөлшектері мен бордақылау шаруашылықтарына арналған техникаларды сатып алуға берілген. Бағдарлама шарттарына сәйкес, несие сомасының кемінде 70 пайызы мал сатып алуға жұмсалуы тиіс.

2025 жылға арналған жалпы қаржыландыру көлемі шамамен 50 миллиард теңге болады. Бағдарлама бойынша сыйақы мөлшерлемесі – жылдық 5%. Қаржыландыру мерзімі – 12 айға дейін. Бағдарламаға ірі қара және ұсақ мал бордақылаумен айналысатын, қажетті өндірістік инфрақұрылымы бар кәсіпорындар қатыса алады. 

Бағдарлама бойынша сатып алынған мал жануарларды есепке алудың ақпараттық жүйесінде тіркеліп, белгіленген жас және салмақ талаптарына сәйкес болуы қажет. Қарыз алушы малдың сатып алынуы мен шығарылуы туралы деректерді міндетті түрде екі жүйеде жүргізіп отыруы тиіс: ауыл шаруашылығы жануарларын есепке алу жүйесінде және селекциялық әрі асыл тұқымдық жұмыстар базасында.

"Аграрлық несие корпорациясы" АҚ тұрақты мал шаруашылығын дамытуға және елдің азық-түлік қауіпсіздігін қамтамасыз етуге бағытталған агроөнеркәсіптік сектордағы қаржы құралдарын кеңейту жұмысын жалғастырып келеді.

Өтінім беру немесе кеңес алу үшін "Аграрлық несие корпорациясы" АҚ-ның ең жақын аймақтық филиалына жүгіну қажет. Қосымша ақпаратты www.agrocredit.kz сайтынан немесе 5353 байланыс нөміріне хабарласу арқылы біле аласыз.