Әблязов ісі: АҚШ соты БТА банкінің пайдасы 218 миллион доллар өндіруді шешті
Нью-Йорктің Оңтүстік округі бойынша АҚШ аудандық сотында алқабилер Triadou SPV S.A.-ға қарсы барлық талаптар бойынша істі "БТА Банкі" АҚ пайдасына шешті, деп хабарлайды Stan.kz ақпарат агенттігі.
Қазылар алқасы БТА компаниясына 2013 жылдың ортасынан бастап есептелген пайызбен 100 миллион доллардан астам шығынды өтеуді міндеттеді. Үкімнің жалпы сомасы 218 миллион доллардан асты.
Банк баспасөз хатшысының мәлімдеуінше, сот процесі 2022 жылдың 29 қарашасында басталды. Онда Мұхтар Әблязовтың алаяқтық пен ақшаны жымқыру әрекеттері дәлелденді.
Әблязовтың күйеу баласы Ильяс Храпуновтың Triadou SPV компаниясы БТА-дан 70 миллион доллардан астам қаражат алып, оны АҚШ-қа салған. Triadou жеті жылдан астам уақыт бойы белсенді түрде соттасып, ақталып шығуға тырысты.
Үш апталық сот талқылауы кезінде алқабилер куәгерлердің, яғни банктің бұрынғы БҚБ-6 бөлімшесінің қызметкерлері, ұрланған қаражатпен жұмыс істеген америкалық инвесторлар, сондай-ақ, сот-бухгалтерлік сараптама мен түрлі сарапшылардың айғақтарын тыңдады.
Қазылар алқасына Triadou компаниясының инвестицияларын қадағалаған Ілияс Храпунов пен Мұхтар Әблязовтың айғақтары да ұсынылған. Бірақ қазылар алқасы одан бас тартып, ақшаны әдейі жымқырды деген қорытындыға келді.
Алматы қаласы мен БТА Банкі атынан Нью-Йоркте сот талқылауы жеті жылдан астам уақыт бұрын қозғалды.
БТА сотта Әблязов, Ілияс Храпунов және Алматының бұрынғы мэрі Виктор Храпунов сот шешімдеріне бағынбай, дәлелдемелерді жойып, қажетті ақпаратты беруден бас тартқанын дәлелдеді.