104 жастағы қарт әйел өмірінде алғаш рет партаға отырып, оқу мен жазуды үйренді
Үндістанның Керала штатының тұрғыны Куттиямма 104 жасында оқу, жазуды үйренді. Әйелдің арманға жету жолындағы ұзақ жолын The Guardian басылымы сілтеме беріп Stan.kz ақпарат агенттігі жазады.
Басылымның мәліметінше, Куттияма бүкіл өмірін ауылда өткізіп, ұзақ жылдар бойы тұрмыстық міндеттерден босамаған. Әйел төменгі таптағы отбасында дүниеге келген, алайда өз құлшынысымен сауатты болуға тырысқан. Бірақ бұл мүмкіндік әйелге 104 жасында беріліпті.
"Маған әлемде не болып жатқаны әрдайым қызық болатын. Осы себепті оқи алмайтыныма талай өкіндім”, – дейді Куттияма.
Отбасындағы жастарға өзіне дауыстап газет оқып беруін сұрайтын көрінеді.
"Ол кезде әйелдерге білім беру мүмкін емес нәрсе болып саналды. Тіпті ұлдар 9 жасында оқуды тастап кететін. Менің ата-анам жері жоқ қарапайым жұмысшылары болды, ал менің міндетім тамақ дайындау, кір жуу және 11 ініммен бірге тұратын үйді ретке келтіру болды", – деп түсіндірді үндістандық әйел.
Ол 16 жасында үйленіп, бес баланың анасы атанған. Осыған қарамастан, оған әрқашан бірдеңе жетіспей тұрғандай көрінетін.
Қараша айында ешқашан партада отырмаған әйел математика пәнінен ең жоғары балл алып, бастауыш мектепке арналған мемлекеттік емтихан тапсырды. Сонымен қатар ол малаялам тілін білу бойынша тест тапсырған. Оның жетістіктері жергілікті билік назарынан тыс қалған жоқ.
"Адамның жасы білім алуға кедергі бола алмайды. Куттияммаға үлкен құрметімді білдіремін, оған және басқа оқушыларға бар жақсылықты тілеймін", — деп жазды Білім министрі Twitter-де әйелді құттықтап.