"Жасөспірімдер үшін түнде жүру – қауіпті": Жазира Байырбекова он екіде туған күнмен құттықтайтындарға үндеу жасады

Танымал әнші Жазира Байырбекова түнгі он екіде туған күнмен құттықтап, көше тыныштығын бұзатындарды сынады. Бұл туралы Stan.kz ақпарат агенттігі хабарлайды. 

Фото: https://www.instagram.com/zhazira_bairbekova/

Өнер иесінің сөзінше, соңғы кезде қоғамда болып жатқан жағдайларға байланысты жасөспірімдерге түнде жүрген қауіпті екен. 

“Құрметті инстадостар! Түнгі 12:00-де арнайы барып туған күнмен құтықтағанды сіз болып, біз болып тоқтатайық. Достар, туыстар, сыныптастар арасындағы чаттарға да жіберіңіз. Бұл нәрсе ешкімге ыңғайлы емес. Ұйықтар уақытта ешкімге ұнайды деп те ойламаймын. Жай ғана инстадан көріп, еліктеу арқылы әдетке айналған болуы керек. Әсіресе жасөспірімдер үшін түнде жүру қауіпті. Келісетіндеріңіз келісемін деп жаза кетіңіздер", – деп жазды әнші. 

• "Тосынсый жасадық": Гүлзира Айдарбекова күйеуінің туған күнін Кипрде тойлады

• "Үлкен үй салып бердім": Мөлдір Әуелбекова ата-анасына ерекше сыйлық жасады

Желі қолданушыларының пікірі екіге жарылды. Бірі қолдаса, енді бірі ұмытылмас сәт сыйлайтынын айтып, әбестігі жоқ деген пікір жазды. 

“Осы мәселені мектепте көтеру керек”, “Қазіргі заман қорқынышты, неше түрлісін естіп жатырмыз”, “Әке-шешені тыңдайтын бала азайды”, “Мен де үйдегілерге оятып, құттықтамаңдар деп айтамын”, “Мұндай мәселелерді өнер өкілдері көтеру керек” деп жазып жатыр көпшілік. 

Еске салайық, "Күйеуімнен ештеңе сұрап көрмеппін" деген Жазира Байырбекова мәһрге қатысты ойын бөліскен еді.