Үш бауырын өрттен құтқарған 11 жасар оқушы «батыр қыз» атанды
Қызылордада алапат жалынның арасынан екі інісі мен сіңлісін алып шыққан 11 жасар Аружан Бисенбаеваның жанұясына көмек қажет. Көпбалалы отбасы екі бөлмелі сарайды ретке келтіріп, қазір сонда тұрып жатыр. Өрттің кесірінен қыс уақытында баспаналарынан айырылған олар, уақытша туыстарының үйін паналауға мәжбүр болыпты.
Аружанның отбасына stan.kz сайтының өңірдегі тілшісі барып қайтқан еді.
Сындарлы сәтте сасып қалмай, бауырларын оттың арасынан аман алып қалған Аружан жақында «Төтенше жағдайдағы ерлігі үшін» медалін иеленді. Мемлекет тарапынан көрсетілген марапатқа жеткіншек дән риза Қазір жасөспірім сыныптастарының арасында «батыр қыз» атанып та үлгеріпті.
«Үйімізден өрт шыққанда қатты қорқып кеттім. Арғы бөлмедегі бауырларым есіме түсті. Шынымды айтсам, оларды қалай алып шыққаным есімде емес. Түтінге тұншығып қала жаздадым. Біразға дейін денемнің дірілі басылған жоқ», – дейді Аружан.
Әпкелерінің арқасында тірі қалған бауырлары да оқиғадан кейін бірнеше күн шошынып жүріпті.
Аружанның анасы Анар Бисенбаеваның тұрақты жұмысы жоқ. Балаларының жәрдемақысына күн көріп отыр. Мүмкіндігі келгенше туыстары берген сарайдың ішін реттеп, алты баласымен сонда тұруда. Бір бөлмесінде ас әзірлеп, ыдыс-аяғын жуса, екіншісінде тамақтанып, ұйықтайды.
«Аружанға ризамын. Сасып қалмай, бауырларын аман алып қалды. Кейін өзі біраз ауырып жатты. Түнімен шошып шыққан кездері де болды. Қазір жазылып келеді. Жан-жақтан көрсетіліп жатқан көмектерге ризамын», – дейді Аружанның анасы Анар.
Оқыс оқиға орын алғаннан кейін қалалық әкімдіктегілер жанұямен жолығыпты. Ақшалай көмек беріп, азық-түлік табыстапты. Мұндай қамқорлықты мұнай компанияларының бірі де көрсетіпті. Алайда, жанұя әлі жомарт жандардың қолдауын қажет етеді.
Бисенбаевтар отбасы алдағы жазда тұру мақсатында туыстары берген осы сарайды реттеп жатыр.
Анар Бисенбаева осыдан бірнеше жыл бұрын көп балалы ана ретінде тұрғын үй алу кезегіне тіркеліпті. Бірақ жаңа баспананы қашан алатыны әзірге белгісіз. Балаларын жалғыз тәрбиелеп отырған ана күн жылынса өртенген үйін шама-шарқы жеткенше жөндеуді жоспарлап отыр.
Алты балалы ана тұрған үйдің өртенгеннен кейін тек қабырғалары ғана қалған.