Орталық Азия елдеріне арналған халықаралық форумның екінші күнін ағылшындық “Ливерпуль” футбол клубының экс-директоры Питер Мур ашты. 2019 жылы Англия Премьер лигасының ең үздік бас директоры болған маман Қазақстанның мұндай дәрежеде конференция өткізуі оң нәтижеге жетелейтінін айтты.

“Бұл форум қазақ футболының дамуына үлкен әсерін береді. Еуропадан алыс жатқан ел үшін футбол стилі ғана емес, маркетингтің де бағытын білу өте маңызды. Сондықтан жиынның спорт мамандарына берері мол. Ең бастысы – сіздер жалғыз емессіздер. Соны түсіну керек”, – деді Мур өз сөзінде.

Форумда келесі сөз кезегін Испания футбол чемпионатында өнер көрсететін каталониялық “Барселона” футбол клубының маркетинг жөніндегі директоры Гиллем Граэль алды. Ол бұл қызметті 2017-2021 жылдары атқарған еді. Каталондық клубта қарқынды жұмыс жасаған Граэль команда алғаш жұмыс ұсынғанда абдырап қалғанын жеткізді.

“Мен “Барселонаға” дейін “Чупа-чупс” саттым. Жо-жоқ әзіл емес, халықаралық Chupa Chups Iberia компаниясының маркетинг жөніндегі санаттық директоры қызметінде болдым. Маған “Барселонадан” хабарласқанда таң қалдым. Бұл жоба мен үшін өте қызық болды. Нәтижесінде каталониялық клубта Пако Энрике серіктесіммен бес жыл жұмыс істедім”, – деді Гиллем.

Тәжірибелі маман қазақстандық клубтарды ақпараттық арнада бірігуге шақырды. Себебі, қазір футбол клубтарына тек алаңда бәсекелес болу керек екенін айтты. Әйтпесе әлеуметтік желілерден және әр түрлі спорт түрінен жеңіліп қалатынын жеткізді.

“Бізді ”Реал Мадридті” жек көреді деп ойлайды, алайда корольдік клуб біздің ең басты серіктесіміз. Олармен тек алаңда ғана бәсекелеспіз. Себебі біз бірікпесек ақпараттық майданда жеңіліс табамыз. Мадрид біздің ақпараттық аймақтағы бәсекелесіміз бе? Жоқ, біздің басты қарсыластарымыз Instagram, Tik-tok, Netflix және басқалары”, – деді “Барселонаның” маркетинг жөніндегі экс-директоры.

Маркетинг маманы футбол клубының жанкүйерлермен арадағы байланыс мықты болу керек екенін меңзеді.

“Фанаттар үшін әрбір командаға жақсы маркетинг керек. Жанкүйерлер кез-келген клубтың басты қаруы болуы керек. Сонда ғана команданың ақпрарат әлеміндегі деңгейі арта түседі. Сол үшін еуропалық командалар өзге құрлықтан жанкүйер табу үшін барын салады”, – деді Гиллам Граэль.

Конференцияға арнайы қатысқан Stan.kz тілшісі лекция соңында Гиллем Граэльге бірнеше сұрақ қойды.

- “Барселона” футбол клубы бұған дейін көп қарызға батты. Ал қазір керісінше, табысты клубтардың қатарындасыздар. Қаржылық қиындықтармен маркетинг бөлімі қалай күресті?

- Бұл мен үшін ауыр сұрақ. Әлемде ақша тапқысы келмейтін футбол командасы жоқ шығар. Негізі қазір де “Барселона” көп қаражат таппайды. Дәл сол қиын сәттерде басшылық бізден маркетингтен көп ақша алып келіңдер деп тапсырма берген жоқ. Бірақ біз клубты таныту арқылы ақша алып келуге болатынын түсіндік. Соның нәтижесінде клуб 2023-2024 жылы футбол маусымында жай ғана тұрмыстық заттарды сатудан 120 миллион еуро пайда тапты. Маркетинг деген осы. Ол клубтың басшылығына да байланысты. Кейде клубтың президенті команданы құлдырауға алып келуі де мүмкін. Бізде алдыңғы президентпен өкінішке орай солай болды.

- Ал “Барселона” секілді атақты командалар сыншылармен (хейтерлермен) қалай күреседі?

- Біз хейтерлерді жақсы көреміз. Сіз бәріне ұнай бермейсіз. Мен “Реал Мадридті” ұнатпаймын, бірақ мен олардың ойындарын көремін. Және жеңістерін мойындаймын. Мен бәрі мені жақсы көргенін қаламаймын. Хейтерлердің көзқарасында қабылдап үйреніңіздер. Егер сіздерде олар болмаса, онда ол жаман.

- Футбол өзге спорт түрлерімен жарыса ала ма? Баскетбол, хоккей, бокс немесе америкалық футболмен қаншалықты бәсекеге түсе алады?

- Өте керемет сұрақ. Жыныстық тұрғыдан футбол күштік спорт түрлеріне қарағанда сүйкімдірек. Және бұл спорт түрінде әйелдер футболы да соңғы жылдары ғаламат дамуда. Әзірге футбол әлемдегі номері бірінші спорт түрі. Бірақ маркетингтің дамуы мен спорттық индустрия тоқтап қалса, онда жағдай қиын болуы мүмкін. Сол үшін де мен бүгін Қазақстанда сіздердің алдарыңыздамын.

Талқылау