Жаңаөзенде өрт сөндіретін көлік жол апатына түсті: Екі адам көз жұмды
Фото: Видеодан скрин
Жаңаөзенде өрт сөндіретін көлік пен Lifan маркалы автокөлік соқтығысып, салдарынан екі адам қаза тапты. Тағы бірнеше адам ауруханаға жеткізілді. Бұл туралы Stan.kz ақпарат агенттігі Lada.kz порталына сілтеме жасап хабарлайды.
Жол апаты 18 қаңтар түнде Маната көшесінде болған. Өрт сөндіру көлігі шақыртуға бара жатқан жолда Lifan маркалы көлігімен соқтығысқан.
Қатты соққы салдарынан арнайы техника жол жиегіндегі қоршауға соғылып, жекеменшік тұрғын үйге кіріп кеткен. Әлеуметтік желіде жол апаты болған сәттегі суреттер мен видеолар тарады.
“Апат салдарынан екі адам қаза тапты. Бес адам жарақат алды, оның үшеуі өрт сөндіру қызметкерлері. Барлығы медициналық мекемелерге жеткізілді. Жол-көлік оқиғасы бойынша сотқа дейінгі тергеу басталды, оның барысында болған жағдайдың мән-жайы мен себептері анықталады”, — деп хабарлады Маңғыстау облысы полиция департаменті.
Ведомствода істің полиция департаменті басшылығының бақылауында екенін атап өтті. Алайда тергеу қай бап бойынша жүргізіліп жатқаны нақтыланбады.
Жаңа үйленсе де өзге қыздарға жазады: Қазақстандық психолог неліктен ерлердің опасыздыққа баратынын айтты
