Жамбыл облысында жүкті әйелдің өліміне кінәлі дәрігерлер жазаланды
Жамбыл облысында жүкті әйел мен баланың өліміне жауапты дәрігерлер жазаланды. Олар науқастың жағдайы нашарлағанын көре тұра, оны тиісті мекемеге ауыстырмаған. Бұл туралы Stan.kz ақпарат агенттігі Хабар арнасына сілтеме жасап хабарлайды.
Фото: Ru.freepik.com
25 жастағы жүкті келіншек наурыз айының басында ауруханаға келіп түскен. Ол денесінің ісініп кеткенін, іші ауыратынын айтып шағымданған. Дәрігерлер науқыстың бүйрегі ауыратынынан күдіктенген. Алайда оны үшінші деңгейдегі медициналық мекемеге ауыстырмаған. Салдарынан 10 наурызда әйелдің жағдайы нашарлап, есінен танып қалған. Дәрігерлер сәбиден де айырылып қалды. Ал науқастың өзі 12 күннен кейін комада есін жимастан қайтыс болды.
Әйелдің өліміне не себеп болғанын анықтау үшін өңірде арнайы комиссия құрылып, қызметтік тергеу жүргізілді.
“Медициналық көмек беру кезіндегі бұзушылықтардың себебі – жүкті әйелдің жағдайының ауырлығын көмек көрсетудің барлық кезеңінде төмен бағалау. Олар әйелдің денесіндегі ісікті, диурездің төмендегенін елемеген. Олар науқасты үшінші деңгейдегі перинаталдық көмек көрсету мекемесіне ауыстыру қажет еді. Дұрыс диагноз қойылған жағдайда оны Тараздағы облыстық перинаталдық орталыққа тасымалдау керек еді”, – деді арнайы комиссияның мүшесі.
Жүкті әйелдің өліміне байланысты Шу аудандық көпсалалы орталық ауруханасының бас дәрігері мен босану бөлімінің меңгерушісі жұмыстан босатылды. Аурухана бас дәрігерінің орынбасары, облыстық денсаулық сақтау басқармасының ана мен бала денсаулығын қорғау бөлімінің жетекшісі және осы басқарманың уақытша басшысы қатаң сөгіс алды.
Еске салсақ, Жамбыл облысында босанған әйел комаға түсіп, жаңа туған сәбиі шетінеп кеткені туралы жазған едік. Қайғылы жағдайдан кейін әйелдің өліміне қатысты тергеу басталды.