100 миллион тоннадан астам қоры бар: Qarmet Кентөбе темір кен орнын игеріп жатыр

Кентөбе кен орны – Qarmet компаниясының Темір кені департаментіндегі келешегі зор нысандардың бірі. Қазір мұнда темір кені ашық әдіспен өндіріліп жатыр. Жылдық көлемі – шамамен 750 мың тонна. Ал биыл өндіру көлемін 850 мың тоннаға дейін арттыру жоспарланып отыр. Бұл туралы Stan.kz ақпарат агенттігі хабарлайды. 

Компанияның шикізаттық базасын нығайту үшін ұзақмерзімді стратегия аясында кен орнын одан әрі дамыту және жерасты әдісімен өндіруге көшу туралы шешім қабылданды. Бұл жобаны іске асыру “Кентөбе” кен орнының ресурстық әлеуетін едәуір арттырып, металлургиялық комбинат өндірісінің өсуі үшін қосымша шикізат базасын қамтамасыз етеді.

Мамандардың бағалауынша, жерасты тәсілімен игеруге болатын темір кені қоры 100 миллион тоннадан асады. Бұл қазіргі ашық карьерлік өндіру көрсеткіштерінен бірнеше есе жоғары және кен орнын ұзақ мерзімге өнеркәсіптік тұрғыда игеруге жаңа мүмкіндік ашады. Жерасты кенішінің құрылысын 2028 жылы бастау жоспарланған. Жобаға сәйкес, болашақ жерасты кешенінің технологиялық сызбасының бір бөлігі ретінде қазіргі қолданыстағы карьер пайдаланылады.

“Компания басшылығы кен орнын одан әрі дамыту және жерасты тәсілімен өндіруге көшу туралы шешім қабылдады. Жобаны іске асыру ресурстық базаны едәуір кеңейтіп, металлургиялық өндіріс үшін темір кенін тұрақты жеткізуді қамтамасыз етеді. Сонымен қатар жоба кәсіпорында жұмыс істейтін Қарағайлы кенті мен Қарқаралы ауданына қарасты жақын маңдағы елді мекен тұрғындарының жұмыспен қамтылуын сақтау және өңірдің өндірістік әлеуетін одан әрі дамытуға ықпал етеді”, – деді Марлен Рысбеков.

Жобаны жүзеге асыру кезінде компания инженерлерінің бұрын Батыс Қаражал кен орнында қолданылған табысты тәжірибесі пайдаланылады. Онда жылына 2,5 миллион тонна марганец кенін өндіруге арналған жоба қуатымен өндіріс іске қосылған. Кен орындарын игеру және заманауи өндірістік шешімдерді енгізу бойынша жинақталған тәжірибе Кентөбе кен орны жобасын дамытуға негіз болады.