Ұлттық банк төрағасы Қазақстанда 85 мың теңге ең төменгі жалақыны ешкім алмайтынын айтты

Фото: freepik.com

Ұлттық банк төрағасы Қазақстанда 85 мың теңге көлеміндегі ең төменгі жалақыны (ЕТЖ) ешкім алмайтынын айтты. Бұл туралы Stan.kz ақпарат агенттігі хабарлайды. 

Ұлттық банк төрағасы үкіметтің 2026 жылы ең төменгі жалақыны көтермеу туралы шешіміне қатысты пікір білдірді. 

"ЕТЖ – бұл жай ғана көрсеткіш. Өзіміз де білеміз, бізде ең төменгі жалақы – 85 мың теңге. Меніңше, мұндай жалақы Қазақстанда жоқ, бәрі одан көп алады. Орташа жалақы – 460 мың теңге, медианалық жалақы – 300 мың теңгеден сәл асады. 85 мың теңге – бұл негізінен статистика үшін есептік көрсеткіш. Егер оны көтерсең, Қазақстандағы бүкіл жалақы деңгейі көтеріледі дегенге мен келіспес едім", – деді Тимур Сүлейменов.

Ұлттық банк төрағасының айтуынша, ең төменгі жалақының көтерілуі мемлекеттік қызметтегі еңбекақының өсуіне әсер етуі мүмкін, бірақ бұл халықтың айтарлықтай бөлігіне әсер етпейді. Ал нарықтық секторда, Сүлейменовтың сөзінше, жалақы өнімділік пен еңбек өнімділігі артқанда ғана көтеріледі. 

"Сондықтан ЕТЖ-ге тым қатты мән берудің қажеті жоқ. Біз жоспарлы экономикада өмір сүріп жатқан жоқпыз, сондықтан ЕТЖ көтерілді екен деп, сіздің басшыңыз, мейлі ол ЖШС болсын, мейлі жеке кәсіпкер болсын, өз қызметкерлерінің жалақысын міндетті түрде көтереді деу қате. Сонымен бірге, ЕТЖ-ны көтеру үшін еңбек өнімділігі бойынша да, әлеуметтік әсерлер тұрғысынан да, инфляцияға ықпалы жағынан да терең зерттеулер қажет", – деді Ұлттық банк төрағасы.

Сүлейменовтың сөзінше, үкіметтің ЕТЖ-ны көтермеу туралы шешіміне еңбек нарығында да, өнімділікте де құрылымдық өзгерістердің болмауы себеп болған.