"Үйсіз қалсаң да бұлардан алмау керек": Алматылықтар Qazaq Stroy үйлерінің сапасыз салынғанын айтып ашуланды
Qazaq Stroy компаниясы мемлекеттік бағдарлама бойынша салған Alem City кешенінің тұрғындары қоныс аударғаннан кейін құрылыстағы түрлі ақауды анықтаған. Алматылықтар сапасыз әрлеуден бөлек, пәтерді жекешелендіру бойынша қиындықтар бар екенін жасырмады. Бұл туралы Stan.kz ақпарат агенттігі хабарлайды.
Фото: Видеодан скрин
Тұрғындар құрылысшының әрекетсіздігіне және өтініштерге жауап болмауына наразылық білдіріп жатыр. Олар кемшіліктерді түзетуді және жекешелендіру шарттарын қайта қарауды талап етіп отыр. Кешен тұрғындары ең бірінші ақау сапасыз жөндеу екенін, оның ішінде қабырғаларда жарылған жерлер, сантехникалық проблемалар және сапасыз әрлеу бар екенін атап өтті. Бұдан бөлек коммуналдық мәселелер де бар. Су мен жылу беру жүйесінде үзілістер жиі байқалған. Құжаттармен байланысты кідірістер де кездесіпті.
Ал кейбір тұрғындар меншік құқығын рәсімдеудің ұзақ уақытқа созылғанын және пәтерді жекешелендіру үшін талап етілетін жоғары сомаларды шағымданып жатыр.
Видеокадрлардан жаңбырдан кейін кермелі төбеге су толып қалғанын көруге болады. Сонымен қатар терезе жарықшаларынан су өтіп, қабырға ылғалданып, едендегі ламинат көтеріліп кеткен.
Әлеуметтік желіде оқырмандар да Qazaq Stroy компаниясынан алдағы уақытта үй алмау керек екенін ескертті.
"Үйсіз қалсаң да, бұлардан алмау керек @qazaqstroy_official. Халықты ойлаған бұлар жоқ! Жұрт қаншама ақшаға алды, не мынау енді? "Шалаштан" кем емес", "Qazaq Stroy-ды ешкімге ұсынбаймын. Бронь үшін алдын ала төлем алады да, қайтармайды! Таңдаған пәтерді көрсетті деген де жоқ. Тек макет арқылы таңдау керек! Өзім барып, құрылыс алаңын тексеріп келдім, жақсы болғаны, олардан пәтер сатып алмағаным! Санына емес, сапасына қарай құрылыс салыңыздар!", "Өте нашар үйлер. Сантехника жұмыстарымен байланысты үнемі мәселелер туындайды. Ал қабырғалардағы жарылулар, дыбыс оқшаулауы туралы мүлде айтпай-ақ қойсам да болады...", "Біз сол жерде тұрдық. Кейін дереу сатуымызға тура келді, жай ғана ақшамыз желге ұшқандай болды. Бұл жерде тұрмағаныңыз жақсы, бәрін жаңадан ауыстыру керек", – деп жазды желі қолданушылары.
Осы ретте Stan.kz редакциясы Qazaq Stroy компаниясына хабарласып, ақаулар туралы сұрады.
"Бұл видеодағы мәлімет актуалды емес. Былтыр түсірілген кадрларды жариялаған. Қазір пәтерлерде мұндай проблема жоқ. Сәйкесінше, біздің тарапымыздан еш түсініктеме болмайды", – деп жауап берді Qazaq Stroy компаниясы.
Компанияның айтуынша, былтырғы ақаулар сол кезде жойылып, қалпына келтірілген. Десе де, тұрғындар бұдан ешнәрсе өзгермегенін айтады.
Еске салайық, бұған дейін әлеуметтік желіде Qazaq Stroy компаниясы құрылыста жұмыс істеп жүрген тәжік азаматына 5 айдан бері айлық бермей жатқаны туралы видео тарады. Шетелдік азамат қазір Алматыда танысының шақыртуымен келгенін және сол арқылы айлық алып жүргенін айтқан еді.
Әкімдік қаладағы ескі брусчаткалардың мұқтаж отбасыға берілгенін айтты: Алайда Боқаев төсеуіштің жеке қолға сатылып жатқанын түсіріп алған (видео)
