Алғабас ауылындағы өрт қасақана жасалмаған, қылмыс құрамы жоқ – Қанат Бозымбаев

Фото: Үкіметтің баспасөз қызметі

Премьер-министрдің орынбасары Қанат Бозымбаев Түркістан облысының Алғабас ауылында 12 адамның өмірін жалмаған қайғылы өрт туралы алдын ала мәліметтерді жария етті. Оның айтуынша, өртті қасақана шығару немесе басқа қылмыстық ниет белгілері анықталған жоқ. Бұл туралы Stan.kz ақпарат агенттігі хабарлайды.

"Оқиға орнында тергеу іс-шаралары жүргізіліп, өрттің себебі анықталып жатыр. Алдын ала қылмыстық құрам жоқ екенін хабарлаймыз", – деді ол үкімет отырысында.

Тергеу аясында Қылмыстық кодекстің 292-бабының 3-бөлігі "Өрт қауіпсіздігі талаптарын бұзу" фактісі бойынша қылмыстық іс қозғалды.

Екі қабатты жеке үйде болған өрт 17 қараша күні таңертең болды. Сағат 05:36-да жалын ғимаратты шарпыды, салдарынан шатырдың бір бөлігі қирады. Сағат 07:22-де өрт толықтай сөндірілді. 12 адам, оның ішінде тоғыз бала қаза тапты. Тағы үшеуі реанимацияда жатыр.

Премьер-министр Олжас Бектеновтің тапсырмасымен үкіметтік комиссия құрылды. Зардап шеккен отбасыларға материалдық және медициналық көмек көрсетіледі. Сондай-ақ тұрғын үй секторындағы өрттердің алдын алу шараларын күшейту, әлеуметтік осал азаматтардың үйлерінде, жатақханалар мен хостелдерде тексерістер жүргізу, сондай-ақ БАҚ пен әлеуметтік желілер арқылы түсіндіру жұмысын жандандыру бойынша нұсқаулар берілді.

Бұрынғы тапсырмалардың орындалуын бақылау Қанат Бозымбаевқа жүктелді.

"Жалпы, жылыту маусымы басталғаннан бері тұрғын үй секторындағы өрт саны өсіп келеді. Біз осы мәселені қазан айында үкімет отырысында қарадық. Алайда жағдай жақсарған жоқ. Сондықтан алдын алу және түсіндіру жұмыстарын күшейту қажет", – деді Олжас Бектенов.

Түркістан облысындағы өрт: Аман қалған үш адамның бірі есін жиды

"Бір үйдің бес баласы бірдей көз жұмды": Түркістан облысындағы 12 адамның қазасына қатысты ақпарат шықты

Еске салайық, бұған дейін Түркістан облысындағы 12 адамның қазасынан кейін жаппай тексеріс жүргізілетінін жазған едік. Әсіресе, коттедждер, жатақханалар мен хостелдер, сондай-ақ пеш жүйелерінің жағдайы ерекеше тексеріледі. Ақаулар анықталған жағдайда жедел шаралар қабылданады.