2014 жылы "Кипрос" ЖШС Орал өзені жағалауындағы демалыс саябағы аумағындағы пирс пен жағажайды пайдалану үшін "SANLEX CONSULT" ЖШС-нен жер учаскесін сатып алды.

2022 жылы прокуратураның өтініші бойынша Жер ресурстарын басқару департаменті бұл жердің заңға сәйкестігін тексерді.

2023 жылы 14 ақпанда аталған ведомство "Кипрос" ЖШС-не жер заңнамасының талаптарын бір жыл ішінде орындау туралы нұсқама берді. Бірақ 2024 жылы 16 ақпанда қайта тексеру жүргізілгенде, құрылыс жұмыстары басталмағаны анықталды.

Осыған байланысты, Атырау облысының Жер ресурстарын басқару департаменті сотқа жүгініп, жерді мемлекетке қайтаруды сұрайды. 2024 жылы 7 маусымда сот талап арызды қанағаттандырып, 0,3046 га жер учаскесін мемлекет меншігіне қайтару туралы шешім шығарды.

Тимур Құлыбаевқа тиесілі мұнай компаниясына 13 миллиард теңгеден астам айыппұл салынды

Алайда, 21 тамызда Атырау облыстық сотының апелляциялық алқасы бұл шешімді бұзып, "Кипрос" ЖШС-нің пайдасына үкім шығарды. Апелляциялық соттың айтуынша, компания 2023 жылдың желтоқсанында құрылыс компаниясымен келісімшарт жасаған және 2024 жылдың қаңтарында сәулет-жоспарлау құжаттарын рәсімдей бастаған.

Бірақ Жоғарғы сот істі қайта қарап, апелляциялық соттың шешімін заңсыз деп тапты. Судьялар жер учаскесін игеру шаралары нұсқама берілгенге дейін қабылдануы тиіс екенін атап өтті.

"Кипрос" ЖШС-нің жоба құжаттарын рәсімдеуі жердің игерілгенін білдірмейді, себебі құрылыс жұмыстары мүлде басталмаған. Осылайша, Жоғарғы сот бірінші сатыдағы соттың шешімін күшінде қалдырып, жер учаскесін мемлекет меншігіне қайтару туралы шешім қабылдады. Сонымен қатар, компаниядан 983 теңге көлемінде мемлекеттік баж салығы өндірілді.

Еске салсақ, Тимур Құлыбаев бас прокуратураның активтерді қайтару комитетімен соттасып жатқаны туралы жазғанбыз.

Талқылау