Ұлттық қауіпсіздік комитетінің төрағасының айтуынша, ұлттық қауіпсіздік органдары 4 террористік актінің алдын алған. Терроризм мен экстремизмге қатысы бар 84 адам сотталған, 44 адам ұсталған. Лаңкестік сипаттағы қылмыс жасады деген күдікпен іздеуде жүрген қазақстандық 6 азамат Сирия мен Түркиядан экстрадицияланып, олардың екеуі сотталды. Ұлттық қауіпсіздік органдары Қазақстанға кірмек болған терроризм мен экстремизмге қатысы бар 824 шетелдіктің жолын кесті.

Сондай-ақ ішкі істер министрлігімен бірге 19 ұйымдасқан қылмыстық топ әшкереленіп, 60 адам қамауға алынды. Одан бөлек заңсыз айналымдағы 505 атыс қаруы, 5 қолдан жасалған жарылғыш құрылғы, 45 жарылғыш топтама және 15 046 оқ-дәрі тәркіленді.

Ермек Сағымбаев өз баяндамасында есірткі өндіретін 33 зертхана, оны тасымалдайтын 35 халықаралық және 31 өңірлік арна жойылғанын және 3,2 тонна есірткі құралдары және психотроптық заттар, 4,5 тонна көкнәр шикізаты, 18,8 тонна прекурсорлар тәркіленгенін айтты. Сонымен қатар есірткі құралдары мен психотроптық заттардың заңсыз айналымына қатысы бар 162 адам сотталған.

“Экономикалық қауіпсіздікті қамтамасыз ету және сыбайлас жемқорлыққа қарсы іс-қимыл аясында 1,6 триллион теңгеден астам көлемде мемлекетке келтірілетін залалға тосқауыл қойылып, бюджетке 315 миллиард теңге өтелген. Сыбайлас жемқорлық әрекет жасағаны үшін 46 адам сотталған. Мемлекеттік шекарада 55 мыңға жуық құқық бұзушы ұсталды, қару мен оқ-дәріні, есірткі мен басқа да тыйым салынған заттарды тасымалдаудың 1300-ден аса әрекетінің жолы кесілген. Шекара арқылы 18 миллиард теңге көлемінде валюта мен құны 66 миллиард теңге болатын тауарларды заңсыз өткізуге жол берілмеген. Заңсыз көші-қонның 20 арнасы тоқтатылған”, – делінген баяндамада.

Сондай-ақ Ұлттық қауіпсіздік комитетінің төрағасы мемлекеттік органдардың ақпараттық жүйелеріне 552 миллионнан астам кибершабуылды және 6 мың DDoS-шабуылға тойтарыс бергенін атап өтті.

Президент кездесу соңында ұлттық қауіпсіздік органдары қызметінің бағыттары бойынша бірқатар тапсырма берді.

Талқылау