Танымал боксшы Тайсон Фьюри мансабын аяқтағанын мәлімдеді
Аса ауыр салмақта өнер көрсеткен 36 жастағы британиялық кәсіпқой боксшы әлеуметтік желіде өз мансабын аяқтау жайлы шешім қабылдағанын айтты. Бұл туралы Stan.kz ақпарат агенттігі хабарлайды.
Фото: Тайсон Фьюри (Getty Images)
"Барлығына сәлем, қысқа да нұсқа айтайын. Мен бокстан кетіп, мансабымды аяқтағаным туралы хабарлаймын. Бұл керемет карьера болды. Мені қолдаған жандардың барлығына зор алғысымды білдіремін", – деді Фьюри.
Тайсон Фьюри аса ауыр салмақта WBC (2020–2024), IBF (2015), WBA Super (2015–2016), WBO (2015–2016), IBO (2015–2016) нұсқалары бойынша бұрынғы әлем чемпионы.
Естеріңізге сала кетейік, британиялық боксшы соңғы жекпе-жегін Александр Усикке қарсы өткізген еді. Эр-Риядта өткен бокс кешінде Фьюри украин спортшысынан екінші рет жеңілді. Кәсіпқой карьерасында "сығандар патшасы" 37 жекпе-жек өткізіп, оның 34-інде жеңіске жетсе, бір кездесуді тең аяқтады.
Британиялық боксшы бұған дейін 2016 және 2022 жылы мансабын тәмамдаған еді.