Әлеуметтік желілерде соңғы қоңырауды эстрада әншілерімен тойлаған мектептің бейнежазбасы тарады. Желі қолданушылары бұл Тараздағы мектеп екенін айтты.

Мұны бір тарап қолдаса, екінші жақ бұлай тойлаудың маңыздылығы жоқ екенін айтады.

"Ата-аналар тырысқан болар?! Дұрыс! Түлектер мектептен кетеді, енді олар үлкен өмірге қадам басады, кімді не күтіп тұрғаны белгісіз", "Соңғы қоңырау – түлектердің мерекесі, оны есте қаларлық және қызықты етіп тойлаудың еш әбестігі жоқ", "Қайрат Нұртас қайда?", "Шынайы мерекеден ештеңе қалмады, Instagram әлемі үшін жасалатын шоулар мен мақтану!" – деп жазды желі қолданушылары.

Жамбыл облыстық білім басқармасы жағдайға түсініктеме беріп, мұны оқушылар ұйымдастырмағанын айтты.

"1 маусым – Халықаралық балаларды қорғау күніне және соңғы қоңырауға орай қазақстандық балуан Бейбіт Ыстыбаевтың бастамасымен Тараздағы Мұратбаев атындағы №17 орта мектебінің мұғалімдеріне алғыс ретінде концерттік бағдарлама ұйымдастырылды. Спортшы – 2003 жылғы түлек. Мерекелік шарада "МузАРТ" тобы, Әбдіжаппар Әлқожа, Нұрболат Абдуллин, Ғазизхан Шекербеков, Еркін Нұржанов сынды әртістер өнер көрсетті. Мектеп әкімшілігі, мұғалімдер, ата-аналар мен оқушылар бұл мерекелік шараны ұйымдастыруға қаражат жинамады”, – деп мәлімдеді Жамбыл облысының білім басқармасы.

Іс-шара мектепті бітірген 20 жыл бұрын 2003 жылғы түлектердің қаражатына ұйымдастырылған.

Талқылау