Джей Ло концертінде жұмыс істеген кәмелетке толмаған волонтерлер ұйымдастырушыларға шағымданды

Фото: Видеодан скрин

10 тамызда Алматыда Дженнифер Лопестің концерті өтті. Бұл оқиға билет сату кезеңінде-ақ үлкен резонанс тудырған еді. Ал концерттен кейін тағы бір жанжал шықты. Әлеуметтік желіде іс-шараға көмектескен волонтерлердің шағымдары жарияланды. Оларды ерекше тәжірибе мен шоу көру мүмкіндігі уәдесімен шақырған, бірақ соңында 12 сағат бойы сусыз, тамақсыз ұстаған. Стадионды тазалатқызған және концерттен кейін уәде етілген трансферді де ұйымдастырмаған. Мән-жайдың қалай болғанын Stan.kz ақпарат агенттігі ұйымдастырушылардан сұрап көрді. 

Концерттегі волонтерлердің көбі кәмелетке толмағандар болды. Құралай есімді волонтер желідегі парақшасында таңғы 35°C аптапта түскі ассыз, бір бөтелке суды бірнеше адаммен бөлісіп ішіп жұмыс істегенін айтты.

"Концертте волонтер болдым және біздің де ұйымдастыруға көңіліміз толмады. Айта кетейін, біздің еңбегімізге ақы төленген жоқ. Біз билетке де, кезекке де орын сатпадық. Қызғылт сары жилет немесе соған ұқсас футболка киген адамдар тек адамдарға бағыт-бағдар көрсетуге жауапты болдық. Кейін бізді ұзақ кезектегі иықтіресті тарқатып, жиналғандарды сабырға шақыруға қойды", – деп жазды волонтер Құралай.

Құралайдың сөзінше, келісімшарт бойынша ұйымдастырушылар жұмыс басталғаннан кейін төрт сағаттан соң бізге су мен тамақ, сондай-ақ трансфер ұсынуы керек болған.

"Бірақ ұйымдастырушылар бізге үзілді-кесілді шарт қойып, біздің кіреберістен барлық адамды өткізіп болғанша тамақтанбайтынымызды айтты. Өйткені бізді алмастыратын ешкім жоқ екен. Біздің көпшілігіміз кәмелетке толмағанбыз. Сөйтіп, біздің сектор тамақты тек сағат 21:00-де, яғни 10 сағат жұмыс істегеннен кейін ғана жеді. Су бір-ақ рет берілді, ол да жеке бөтелке емес, 4-5 адамға бір бөтелкеден болды. Концерттен кейін біз стадион аумағын тазалауымыз керек екені, ал трансфер болмайтыны белгілі болды. Сонымен қатар бізге "сағат 23:00 болғандықтан полицияға ұсталып қалмау үшін тезірек кетіңдер" деп айтты. Сондықтан, өтінемін, жалған ақпарат таратпаңыздар", – деп түсіндірді Құралай.

Посмотреть в Threads

Тағы бір rimaru_l04 есімді волонтер ұйымдастырушылардің сөзін алға тартып олар міндеттерін орындаған соң концертті көре аласыздар деп уәде еткенін айтады. Алайда стадион сыртында жұмыс істегендерді ішке мүлдем кіргізбеген.

"Біз тегін жұмыс істейтінімізді білдік, бірақ ең болмағанда адамгершілік қарым-қатынас болады деп үміттендік. Біз тырыстық, қонақтарға көмектестік, қолдау көрсеттік", – деді жастар.

Алайда қолданушылардың пікірі екіге бөлінді. Кейбір волонтерлердің шағымы орынсыз деп санайды, өйткені әлемдік деңгейдегі жұлдыздың концертіне қатысу жұмсалған күш-жігерге тұрарлық болған.

"Ешкім волонтерлерді күштеп әкелген жоқ. Мен де сол жерде болдым. Егер барсаң, өз еркіңмен бардың. Ас-суды кешкі алты-жеті шамасында береміз деп уәде етті. Таңғы ас жақсы ішсең, күшің жетеді. Ал көлік мәселесіне келсек, алдын ала оның нақты емес екенін ескерткен еді", – деп жазады қыздардың бірі.

Еріктілер айтуынша, оларға тікелей шағымданғаны немесе "жаман қылық көрсеткені" үшін қара тізімге енгізіп, болашақта мұндай шараларға қатыстырмайтынын ескерткен.

"Біз тегін баратынымызды білдік, бірақ бұл 12 сағат бойы тамақсыз, сусыз және демалыссыз жұмыс істейміз деген сөз екенін білмедік", – дейді волонтерлер.

Кей ата-аналар мұндай жағдайдың бұрын да болғанын айтты. Олардың бірі Вера Брежневаның концертінен кейін қызы аштан талып қала жаздағанын, тамақ берілмей, дүкенге шығуға рұқсат етілмегенін, содан соң қызына мұндай шараларға қатысуға тыйым салғанын жеткізді.

Фото: Алматы әкімдігі

Іс-шара аяқталған соң волонтерлерді бірден босатпай, аумақты жинауға мәжбүрлеген. Бұған қоса, стадион маңында жалған билетпен келген адамдарды тыныштандырып, таратқан да волонтерлер екен.

Бұған Алматы әкімдігі Дженнифер Лопестің концерті аяқталған соң еріктілер мен жастар ұйымдары "Taza Qazaqstan" акциясы аясында Орталық стадион мен маңайын жинағанын хабарлады. Ұйымдастырушылар бұл шараны қалаға деген қамқорлық пен мәдени іс-шаралардың ажырамас бөлігі деп атап өтті.

Айта кетейік, Алматыдағы концерттің ұйымдастырушылары – Astana Concert және First Media Group. Волонтерлерді жинауды Birgemiz Almaty волонтерлерінің фронт-офисі жүргізген. Өтінішті кез келген адам бере алған.

Stan.kz редакциясы концерт ұйымдастырушыларына және волонтерлік ұйымға ресми сауал жолдады. Осы ретте Astana Concert іс-шараның ұйымдастырушылары өздері емес, тек билеттерді сатқанын, ал ұйымдастырушылардың First Media Group екенін айтты.

Ал "Ашық жүрек" өздерін жобадағы тек белгілі бір нүктелерге жауапты координаторлар, яғни басқа волонтерлер сияқты болғанын айтты. Сондай-ақ барлық сұрақты жалпы қалалық іріктеуді жүргізген Birgemiz Almaty өкілдеріне қоюды өтінді. First Media Group басшысы Дана Қарағұсова да жауапкершіліктен басын ала қашты.

“Волонтерлерді әкімдік бөлді. Біз барлық ескертпелерді оларға жеткіземіз", – деді First Media Group.

Ал Birgemiz Almaty іс-шараны ұйымдастыруға көмектесу үшін волонтерлерді ашық қабылдау жарияланып, оған 6 мыңнан астам адам өтініш білдіргенін айтады. Осылайша, 300 адам іріктеліп, жұмысқа шақырылған.

“Шараға бір апта қалғанда барлық волонтерлерге қатысу шарттары түсіндіріліп, нұсқаулық берілді. Концерт күні олар іс-шара серіктесінің бірі кафе желісі тарапынан тамақ және сусындармен қамтамасыз етілді, сондай-ақ демалыс үзілістері болды. Ас беру күн бойы ауысым кестесіне сәйкес жүргізілді. Бастапқыда концерт 19:00-де басталып, 21:00-де аяқталады деп жоспарланғандықтан, кәмелетке толмағандар да қабылданды және арнайы трансфер көзделмеді. Себебі қала ішінде қоғамдық көлік 23:00-ге дейін қатынайды. Стадион аумағында ауыз суға қол жеткізу мүмкіндігі қамтамасыз етіліп, жеке заттарды сақтауға және демалуға арналған арнайы аймақ жабдықталды. Ұйымдастырушылар волонтерлермен тұрақты байланыста болып, қажет жағдайда бірін-бірі алмастыруға және шамадан тыс жүктемеден аулақ болуға жағдай жасады. Әр қатысушы жұмыс уақытының ұзақтығын өз қалауынша анықтай алды. Концерттен кейінгі аумақты жинауға көмек көрсету purely ерікті сипатта болды”, – деп жауап берді Birgemiz Almaty.

Birgemiz Almaty кейбір жарияланымдарда көрсетілген деректер шынайы жағдайды толық көрсетпейтінін атап өтті.