Талдықорғанда қонақүй администраторын өлтіріп кеткен
Фото: Booking.com
Талдықорғандағы қонақүйлердің бірінде өрт шығып, құтқарушылар зорлық-зомбылықпен өлім белгілері бар әйелдің денесін тапты. Болжам бойынша, қылмыскер от қою арқылы ізін жасырмақ болған. Бұл туралы Stan.kz ақпарат агенттігі хабарлайды.
Жетісу облысының төтенше жағдайлар департаменті 24 мамыр таңғы сағат 4:14-те Paradise Villa қонақүйінің бірінші қабатында өрт шыққанын мәлімдеді. Өрт 20 шаршы метрді шарпыған. 15 минуттың ішінде өрт сөндіріліп, ғимараттан 35 адам қауіпсіз жерге шығарылды.
Құтқарушылар үй-жайды тексеру кезінде администратор әйелдің мәйітін тапты. Кейін оның денесінде 12 пышақ жарақаты бар екені анықталды.
Жетісу облыстық полиция департаменті "Адам өлтіру" бабы бойынша қылмыстық іс қозғады. Күдікті тез арада ұсталды, ол 23 жастағы жергілікті тұрғын болып шықты. Қазір ол қамауда, тергеушілер онымен жұмыс істеп жатыр.
Тергеу оқиғаның барлық мән-жайын анықтап жатыр. Тәртіп сақшылары кісі өлтіруші қылмыстың ізін жасыру үшін қабылдау бөлмесін қасақана өртеп жіберген болуы мүмкін екенін жоққа шығармайды. Тергеу мүддесі үшін әзірге қосымша ақпарат жарияланбайды.
Қазақта күйеу жігіт қайын жұртына иіліп сәлем салған – Этнограф
