"Тағы ұрланса, күлкіге қаламыз": Антикор қайтарылған заңсыз активтерге қатысты пікір білдірді
Сыбайлас жемқорлыққа қарсы іс-қимыл агенттігі төрағасының орынбасары Ұлан Сарқұловелге қайтарылған заңсыз активтер "тағы ұрланса" не болады деген сауалға жауап берді. Бұл туралы Stan.kz ақпарат агенттігі хабарлайды.
Фото: iStock
Сыбайлас жемқорлыққа қарсы іс-қимыл агенттігі төрағасының орынбасары Ұлан Сарқұлов бұл өте маңызды мәселе екенін айтты.
"Өте жақсы, өте өзекті сұрақ. Мемлекет басшысы айтқан әлеуметтік нысандарды салуға жұмсалатын қайтарылған қаражат тағы бір рет ұрланса, күлкіге қаламыз”, – деді Сарқұлов.
Сондай-ақ ол мұндай оқиғалар болса, кінәлілер заң аясында жауапкершілікке тартылуға тиіс екенін жеткізді.
Айта кетейік, бұған дейін Астанада қайтарылған мүлік санатындағы тұрғын емес үй-жай аукционда 108 миллион теңгеге сатылғаны туралы жазған едік. Қайтарылған активтерді басқару жөніндегі компания аукцион E-Qazyna электронды платформасында өткенін хабарлаған. Аукцион барысында қайтарылған мүлік – Астанада орналасқан тұрғын емес үй-жай сәтті сатылған. Мүлік Қосылған құн салығымен 108 миллион 461 мың 438 теңге болған.