Сыбайлас жемқорлыққа қарсы қызмет Кентаудың экс-әкіміне қатысты тергеуді аяқтады
Сыбайлас жемқорлыққа қарсы қызмет Кентау қаласының экс-әкімі Рашид Аюповқа қатысты тергеуді аяқтады. Ол 2013 жылы ол премьер-министр кеңсесінің қызметкері бола отырып, ірі жеке меншік компанияның иесін жауапты лауазымды тұлғаларға аса ірі сомада пара беруге көндірді деп айыпталған. Бұл туралы Stan.kz ақпарат агенттігі хабарлайды.
Рашид Аюпов лауазымды тұлғаларды пара беруге көндіру үшін құрылыс бойынша тендерде жеңісті қамтамасыз етуге уәде берген. Талап етілген соманы алған соң, өзіне қалдырып, ақшасының бір бөлігін Астана қаласынан жаңа үй, қымбат тұратын автокөлік және бірнеше жүк техникасын сатып алуға жұмсады.
Оның әрекеттері аса ірі көлемде пара беруге арандату және алаяқтық ретінде сараланған, тергеу сотының санкциясымен ол қамауда отыр.
Қазіргі уақытта қылмыстық іс материалдары қабылданған шешімнің заңдылығын тексеру және одан әрі сотқа жолдау үшін Астана қаласының прокуратурасына тапсырылды. Тергеу мүддесі үшін өзге ақпарат жария етуге жатпайды.
Сонымен бірге Конституцияның 77-бабы 3-тармағының 1-тармақшасына және Қылмыстық-процестік Кодексінің 19-бабы 1-бөлігіне сәйкес, қылмыстық құқық бұзушылық жасаудағы кінәсі соттың заңды күшіне енген үкімімен белгіленгенге дейін әрбір адам кінәсіз деп есептеледі.