Антикор Қайрат Сатыбалдыұлынан тәркіленген мүліктердің тізімін жариялады

Сыбайлас жемқорлыққа қарсы іс-қимыл агенттігінің ресми өкілі Данияр Бигайдаров елге қайтарылған мүліктер туралы мәлімдеме жасады. Бұл туралы Stan.kz ақпарат агенттігі хабарлайды. 

Видеодан скрин

Агенттік өкілінің айтуынша, 2022 жылы мемлекеттік және квазимемлекеттік секторға 1,1 триллион теңгеден астам сомаға мүліктік активтер мен ақшалай қаражат қайтарылған.

"Оның 321,6 млрд теңгесі тікелей бюджетке қайтарылды. Қайтарылған активтер арасында әкімшілік ғимараттар, эксклюзивті зергерлік бұйымдар, үйлер, пәтерлер, автокөліктер, акциялар, компаниялардағы үлестер, теміржолдар және қолма-қол ақшалар бар”, – деді Бигайдаров. 

• Көліктер, төрт вилла, бренд сағаттар: Қайрат Сатыбалдыұлының тағы 50 миллиард теңгеден астам активі мемлекетке қайтарылды

• Қайрат Сатыбалдының Дубайдағы қымбат көліктері сатылды: Ақша қайта кетеді

Агенттік өкілінің мәліметінше, биыл бірнеше нысан қайтарылған. Оның ішінде Алматыдағы құны 7,9 млрд теңгені құрайтын "Қайсар Tower" бизнес орталығының ғимараты Қазақ ұлттық қыздар педагогикалық университетінің меншігіне берілді.

"Сонымен қатар Жүргенов атындағы Қазақ ұлттық өнер академиясының балансына құны 800 млн теңгеден асатын әкімшілік ғимарат берілді. Астанада құны 5 миллиард теңгеден асатын үш зәулім үй "Астана қаласы әкімдігінің мүмкіндігі шектеулі балаларға арналған психологиялық-педагогикалық түзету басқармасына" берілді”, – деді ол.

Айта кетейік, бұған дейін аталмыш нысандардың Қайрат Сатыбалдыұлына тиесілі екені хабарланған еді.

Бигайдаров мемлекетке қайтарылған мүліктің барлығы әлеуметтік мақсатта пайдаланылатынын атап өтті. Атап айтқанда сыбайлас жемқорлыққа қарсы іс-қимыл агенттігі қайтарған 153,3 миллиард теңгеге Қазақстанның бірқатар өңірлерінде 92 мың орындық 83 мектептің құрылысы қаржыландырылған. 

Бұған дейін сыбайлас жемқорлыққа қарсы іс-қимыл агенттігі сотталған Қайрат Сатыбалдыұлы келтірілген шығынды өтеу мақсатында қайтарған жылжымайтын мүлік объектілерінің мемлекетке өткенін хабарлаған еді.

Еске салсақ, 2024 жылдың 16 тамыз күні Өскемен қаласының №2 соты сотталған Қайрат Сатыбалдының жазасының өтелмеген бөлігін жазаның неғұрлым жеңіл түріне ауыстыру туралы өтінішхатын қанағаттандырып бас бостандығынан айыру түріндегі жазаның өтелмеген бөлігін 3 жыл 3 ай 7 күн мерзімге бас бостандығын шектеуге ауыстырды.