Шри-Ланкада 20 жылдан бері енді болған су тасқыны салдарынан 132 адам қаза тапты

Фото: Unsplash, Reuters

Шри-Ланкада толассыз жаңбыр жауып, жиырма жылдан бері болмаған ең ірі су тасқынын тудырды. «Дитва» циклоны ел аумағында 132 адамның өліміне себеп болып, тағы 176 адам хабар-ошарсыз кеткті. Бұл туралы Stan.kz ақпарат агенттігі Bloomberg басылымына сілтеме жасап хабарлайды.

Елдің Төтенше жағдайларды басқару орталығының мәліметінше, Шри-Ланканың солтүстігі мен орталық аймақтарында қауіп деңгейі өте жоғары. Метеорология департаменті 30 қарашаға дейін ауа райы өте қауіпті болатынын ескертіп, тұрғындарды сақ болуға шақырды.

AFP хабарлауынша, құтқару және гуманитарлық жұмыстар жүргізіліп жатыр. 44 мыңға жуық адам жауын мен су тасқыны салдарынан баспанасыз қалып, мемлекеттік көмек көрсету орталықтарына эвакуацияланған. Президент Анура Кумара Диссанаяке 28 қарашада елде төтенше жағдай режимін енгізді.

Фото: globallookpress.com

“Сабарагамува мен батыс провинцияларының кейбір жерлерінде 50 миллиметрден астам қатты жаңбыр жаууы мүмкін”, – деп хабарлады Метеорология департаменті.

Шамамен 22 миллион адам тұратын аралдың көп бөлігінде қатты жел соғады деп болжанып отыр.

26 қарашада Шри-Ланкаға “Дитва” циклоны соғып, елдің бүкіл бөлігін жаңбыр мен су тасқыны шайып кетті. Циклон елден алыстағанымен, оның жанама әсерлері әлі де жалғасып жатыр.

Қазір циклон солтүстікке қарай жылжып, Үндістанның оңтүстігіндегі Тамилнад штатына бет алған. Аймақта жаңбыр басталып, билік тұрғындар мен туристерге ескерту жариялады.

Фото: globallookpress.com

Шри-Ланка парламентіндегі жоспарлы бюджет талқылауы тоқтатылып, Коломбо қор биржасы 28 қарашада сауда уақытын қысқартты.

Төменгі өңірлердегі тұрғындарға, әсіресе Коломбо округіндегі Келани өзенінің жағалауындағыларға, жоғары жерге көшуге нұсқау берілді. Мектептер мен мемлекеттік мекемелердің көбі уақытша жабылды.

Ирригация департаменті Махавели өзенінің жанындағы ойпатты аймақтарда “сыни деңгейдегі су тасқыны” болатынын ескертіп, халықты дереу эвакуациялануға шақырды.

Шри-Ланка үкіметі ел бойынша құтқару және гуманитарлық шараларды күшейту үшін әскери күштерді тартты. Әскерилер тікұшақтар мен қайықтарды пайдаланып, су басқан аймақтағы тұрғындарды қауіпсіз жерге шығарып жатыр. 29 қараша күні әскери-теңіз күштері су басқан аймақта қалған автобустағы 40 жолаушыны құтқарды.

Электр желісіне келтірілген зақымдарды қалпына келтіру жұмыстары әлі аяқталған жоқ. Метеорология департаментінің бас директоры Атула Карунанаяке су тасқыны болған аудандардың тұрғындарына құдық суын ішпеуге кеңес берді. Себебі ол денсаулыққа қауіпті болуы мүмкін. Елдің бірнеше өңірінде мобильді байланыс пен интернет те істен шыққан.