Қас-қағым сəтте əлек салған тасқыннан, абырой болғанда, адам шығыны жоқ. Қоңырау түскен бойда дереу қимылдаған жергілікті билік 120 адамды қауіпсіз жерге көшірген. Бүгінде мұнда тасқынның зардаптарын жою үшін Шымкенттен арнайы құтқарушылар келген. Олар су шайған баспаналарды тазартып жатыр. Бірақ тұрғындар көлкіген суда қалған дүние-мүліктерін əлі де шығара алмай жүр.

“Есікті ашып едім, бірден су кірді. Ұлым екеуміз сыртқы киімімізді киіп үлгердік. Енді осы киіммен қалдық. Үйіме коммисия да кіре алмай жүр”, – дейді Шемонаиха қаласының тұрғыны Вера Шестакова.

Иə, тасқынның астында қалған 50-ден аса баспананың, бүгінде 10-ға жуығы жарамсыз деп танылып отыр. Себебі, кейбіреулерінің қабырғалары құлап қалған. Ал далада қалған жұртқа арнайы сапармен келген облыс əкімі Даниал Ахметов қаражат бөліп баспана сатып əперуге уəде беріп кеткен көрінеді.

Бірақ, жұрт Оба өзенінің мұзын дер кезінде жармаған жергілікті биліктің жауапсыздығына ашуланып отыр. Айтуларынша, бір метрлік тереңдіктегі мұзға тірелген су, өзен жағасындағы шамамен 6 метр биіктіктегі жардан асып кеткен сыңайлы. Алайда, өздеріне шаң жуытқысы келмеген атқамінерлер бұны тасқынның ерте басталғанымен байланыстырып отыр. Сонымен қатар, күнінің аяқ асты жылынып, жаңбырдың көп болуы да судың деңгейін арттырғанын алға тартып əлек.

“Қазір 10 су сорғыш қондырғы орнатылған. Тазарту жұмыстары жүргізілуде. Біз инерттік материалдармен қамтамасыз етіп жатырмыз”, – дейді Шемонаиха қаласының əкімі Мұрат Желдібаев.

Қазіргі уақытта, топан су шайған баспаналардың аулаларынан 3 мың текше метрден аса су тазартылған. Сондай- ақ, шыққан шығын мөлшерін арнайы құрылған коммисия анықтап жатыр.

Оқи отырыңыз:

Ақтөбеде тұрғындар жүйке ауруына шалдыққандармен бір емханада емделуге қарсы шықты

Таразда 3 400 теңге үшін дәмханада болған атысқа қатысты жаңа дерек шықты

Депутаттар «Тұрғын үй құрылыс жинақ банкін» сатуға қарсы шықты

Мәжіліс депутаты жекешелендіруге қатысты: Бұл не мазақ?

Талқылау