"Мемлекеттік бағдарламамен пәтер аламыз": Шымкент тұрғындары алаяққа алданды
Шымкентте мемлекеттік бағдарламамен пәтер аламыз дегендер алаяққа алданып қалдық дейді. Бар ақшасын беріп баспанасыз қалғандар бүгін прокуратураның алдына жиналды. Бұл туралы Stan.kz ақпарат агенттігі КТК арнасына сілтеме жасап хабарлайды.
Әлеуметік аз қамтылған отбасыларға арналған үй алып береміз дегендер уәдесін орындамаған.
Алданып қалғанын кеш түсінгендер талай табалдырықты тоздырып арыз жазған. Бірақ бір жылдан бері үнімізге құзырлы органдар құлақ аспай отыр деп наразы. Десе де полицейлер жұрттың ақшасын алып алдап кеткендерге қатысты бір апта бұрын іс қозғалғанын жеткізді.
“Бізге түсіндіріп керек емес, онсыз да бар ғой, алдана алдана болдық. Бір жыл болды күтіп жүргенімізге, бір жыл! Неге қамамайсыздар, алаяқ Ділмішов Асқар!” – дейді олар.
"Алаяққа алданып қалдық" деген тұрғындар прокуратураның алдына жиналды. Олар мемлекеттік бағдарламамен пәтер аламыз дегендерге алдын ала ақшасын беріп қойған. Бірақ не ақша, не баспана болмаған соң, құзырлы орындарға талай мәрте шағымданыпты. Ал тергеушілер істі бұрмалап, ақша жинап алған азаматты күдікті емес, куәгер қылып жібере салды дейді жиналғандар.
“Ділмішов Асқар екеуін беттестіргендегі сөзінің бәрін жалған қып жазған. Анаған сұрақ қойған, ол "иә, алдым" деген. Мен мынадаймынадай болды деп, бәрін бұрмалап, басқалай жазған. Тергеушілер бұрмалаған. Құжаттарын кейін адвокатымыз тапты”, –дейді Сәуле Боранбаева.
Жылдам пәтер алуға көмектесемін деп, жұрттың ақшасын алып жатқан осы азамат. Тіпті тұрғындарға қолхат та жазып беріп жатыр. Ол баспана кезегін жылжытып, "аз қамтылған отбасыларға үй алып беремін" деген желеумен 70-тен астам азаматтан 2-7 миллион теңге аралығында ақша алды дейді жиналғандар.
“Прокуратура, барлық сотқа бардық, бармаған жер қалмады. Бірақ ешқайсысы қимылдаған жоқ, ештеңе істеген жоқ. Өзімізге қарсы шығады. Ділмішов Асқар "бүкіл Шымкенттің прокуратурасы бола ма, ДВД бастығы, сот, бәрін сатып алдым" деген аудиожзбасы да бар”, – дейді Нағима Битөреева.
Тұрғындардың талабынан кейін аудан прокуроры мен полиция басқармасының басшылары кездесуге келді. Бірақ екі жақтың әңгімесі жарасқан жоқ. Десе де полицейлер алданғандардың арызымен сегіз күн бұрын ғана қылмыстық іс қозғалғанын жеткізді.
“Қазір 31 адам жәбірленуші бар. Бәрін жәбірленуші деп танып, жауаптарын алып, тергеу жүргіземіз. Асқар деген кісіге қатысты дәл солай. Алаяқтық бабымен 190-бап, 3-бөгімен, 14 маусым 2023 жыл”, – дейді әл-Фараби ауданы ПБ бастығының тергеу жөніндегі орынбасары Жәнібек Нұрлыбаев.
Ал тұрғындар айыптап отырған азамат ақша алғанын жасырмайды. Бірақ өзім де әкімдікте жұмыс істейтін көрші әйелдің сөзіне сеніп қалдым деп отыр. Тіпті жұрттан жинаған ақшадан көк тиын пайда көрмедім деп ақталды.