Ақпаратқа сәйкес, 2 қаңтарда полицияға Ақсай қаласының 16 жастағы тұрғынына қатысты заңға қайшы әрекеттер жасалғаны туралы хабарлама түскен. Кейін дерек бойынша қылмыстық іс тіркелген.
Ведомствоның мәліметінше, тергеу барысында хат алмасулар мен істің объективті қаралуына маңызды өзге де материалдар зерттелген. Тергеу нәтижесінде кәмелетке толмағанға қатысты күш қолдану фактісі анықталмаған.
“Бұл жайтты жәбірленушінің өзі және анасы да растады. Олар күдіктіге қатысты қандай да бір талап-шағымдары жоқ екенін айтып, қарым-қатынастың өзара келісіммен болғанын жеткізді”, – деп мәлімдеді полиция өкілдері.
Департамент дерегіне сәйкес, күдікті аудан әкімдігі бөлімдерінің бірінде қызмет еткен. Арыз түскеннен кейін ол жұмыстан босатылған. Қазір тергеу жалғасып жатыр, іс полиция департаменті басшылығының бақылауында.
