Серік Сәпиев жаңа қызметке тағайындалды
Бокстан Олимпиада чемпионы Серік Сәпиев Қарағанды облысының дене шынықтыру және спорт басқармасының басшысы болып тағайындалды. Бұл туралы Stan.kz ақпарат агенттігі хабарлайды.
Фото: Туризм және спорт министрлігі
Тағайындау туралы Туризм және спорт министрлігі мәлімдеді.
"Елордада Туризм және спорт министрі Ербол Мырзабосыновтың төрағалығымен өңірлік спорт басқармаларының басшысын тағайындау бойынша комиссия отырысы өтті. Отырыста Қарағанды облыстық дене шынықтыру және спорт басқармасының басшылығына бокстан Лондон Олимпиадасының чемпионы Серік Сәпиевті тағайындау туралы шешім шығарылды", – делінген хабарламада.
Серік Сәпиев – қазақ боксшысы, екі дүркін әлем чемпионы (2005, 2007) және 2012 жылы Лондонда өткен Олимпиада чемпионы.
Сәпиев 2021 жылға дейін Қазақстан Мәдениет және спорт министрлігі Спорт және дене шынықтыру істері комитетінің төрағасы қызметін атқарған. 2019 жылға дейін Мәжіліс депутаты болды.
2024 жылдың ақпанында спортшы Қазақстан Ұлттық Олимпиадалық комитетінің паралимпиадалық спорт түрлерін дамыту жөніндегі вице-президенті болып тағайындалды.
Айта кетейік, бұған дейін Танымал боксшы Данияр Елеусінов Туризм және спорт министрі Ермек Маржықпаевты жаңа қызметке тағайындалуымен құттықтап, Серік Сәпиевті өз командасына алуды өтінген еді.