"Сегіз жыл бойы ұрып-соғып, қорқытып келген": Көкшетауда азаматтық некедегі жұбайын өз-өзіне қол жұмсауға итермелеген ер адам төрт жылға сотталды
Көкшетауда сот азаматтық некедегі жұбайын өз-өзіне қол жұмсауға дейін итермелеген ер адамды төрт жылға бостандығынан айырды. Деректерге сүйенсек, ол сегіз жыл бойы жұбайын ұрып-соғып, қорқытып, жұмыс істетпеген. Бұл туралы Stan.kz ақпарат агенттігі хабарлайды.
Фото: freepik.com
Соттың мәліметі бойынша, айыпталушы жәбірленушімен 2016 жылдан бері азаматтық некеде тұрған. Сегіз жыл бойы ол әйелді ұрып-соғып, балаңнан айырып, күнкөріссіз қалдырамын деп қорқытып, жұмыс істеуіне тыйым салған. Жәбірленуші бірнеше рет жарақат алып, ауруханаға түскен. Бірақ ол туыстарының бұл жағдайға араласуына жол бермеген.
"Сонымен қатар жәбірленуші отбасының қажеттіліктері үшін несие алған. Сөйтіп банк алдында берешегі болып, қаржылық қиын жағдайға тап болған", – деп атап өтті сотта.
Соңғы жанжал кезінде әйел полиция шақырған. Бірақ құқық қорғау органдарының қызметкерлері болса да айыпталушы оны қорлауын тоқтатпаған. Ер адам ұсталғаннан кейін жәбірленуші оның қайтып келуінен қорқып, туыстарына қоштасу хабарламасын жазып, өз-өзіне қол жұмсап, асылып қалған.
Жәбірленушіден психикалық аурулар немесе бұзылулар анықталған жоқ.
"Көкшетау қалалық соты айыпталушының азаматына қатысты істі азаматтық жұбайын қорқыту, ұрып-соғу және қадір-қасиетін қорлау арқылы өз-өзіне қол жұмсады деп қарады (ҚК 105-бабы 2-бөлігінің 1-тармағы). Сотталушы И сот үкімімен кінәлі деп танылып, оған төрт жыл, бір ай мерзімге бас бостандығынан айыру жазасы тағайындалды", – деді Ақмола облысы соттарының баспасөз қызметі.
Сот сонымен қатар жәбірленуші тарапқа 7 миллион теңге сомада моральдық зиянды өтеу талабын қанағаттандырды.